Van den Aflaet Jesu Christi, ghesproocken tusschen Hebron ende Hattus.
Eerste capittel.
Oft nu ter tijt sorchlijck is in Hollant goede Boecken te doen Drucken.
HEBRON.
Hatte Hatte, ick dught het met u qualijck wil eynden. Hattus. Waerom dat? Hebr. Ghy wilt niet eynden d'Overheyt u te vyant te maken. Hattus. Dat is mijn voornemen niet, noch dat doe ick niet. Hebron. Ghy doet uwe groove dolingen drucken. Hattus. Dats my noch van niemant overkent. Ick doe goede boecken drucken, dats noch in Hollant niet verboden. Dus misdoe ick daer aen niet. Om weldoen en vreest men niet, dan daer Godloosen heerschappen, Dat is soo noch hier te Lande niet Gode lof. Hebron. Ghy merckt wel dat d'Overheyt uwe meyninge mishaecht, dus hebdy te vresen. Hattus. Niet ick, maer ghy. Hebron. Ick? hoe datte? Hattus. Die heeft reden om d'Overheyts straffe te vreesen, diese op't hoochste in heur eere quetset. Dit doet elck die sulcke dingen seyt, daer uut men soude moeten verstaen dat d'Overheyt der waerheydt ende der Lantsaten Vyandt is. Dit moetmen verstaen van de gheen, die door 't verbieden van goede boecken (die schrijver (soo hy leeft) onvolhoordt zijnde) haere heylsame verbreedinghe ende mitsdien der Lantsaten salicheyt willen beletten. Dese dingen seght ghy niet bedecktelijck van de Overheyt. Dus hebt ghy rechtelijck d'Overheyts straffe te vreesen, ende geensins ick. Hebron. Is u dan alleen verhoolen wat uwe boecken is wedervaeren? Hattus. Waer? Hebron. Ick sal't u int Oor luysteren. Hattus. Wats daer met mijne bocken geschiet? Hebron. So men in den Hage begon te disputeren, werden daer alle Coornherts boecken ghehaelt uut alle Boeckverkoopers winckelen, men dacht voorsichtelijck 'tvolck sal nieu gierich zijn om zijne opinien te weten, zijne Boecken koopen, lesen ende verleyt worden. Hattus. Dat dit het eynde gheweest sou zijn van sulcks, en weet ghy niet: ende dat het geschiet soude zijn en geloove ick niet, soude sulcken Magnifiken Raet self so haest anderen doen't gene waer van zy luyden sich noch soo onlanghs vanden Inquisiteur swaerlijck beklaeght hebben? Een mans werck ende ghevoelen onverhoort veroordeelen? dat soude henluyden niet wel voegen, te min noch nadien die sake door de hooghe Overheyt ende Staten van Hollandt nu al was betrocken in een openbare Disputatie, u moet qualijck aenghegeven zijn. Hebron. Jae, soo qualijck als dat het daer al over twee jaren in een Boeckverkopers Winckel geschiet is. Is dit mede loghen? of hebdy't met uwen schade niet self bevonden? Hattus. Een vuyrich yveraer mocht dat suxxeptieelijck veroorsaeckt hebben, maer dit dus gheneralijck en mach ick so treffelijcken Collegio niet toebetrouwen, want mijn werck streckt tot Godes ende Christi eere ende totter menschen salicheyt. Wat vroom mensche soude sulcks willen bestaen te hinderen?
Auteursrechtvrij