Cirurgia of Hantgewerck int lichame der menschen

82. Waer aen soectmen seker die broke ?

Maer is die broke dweers in al dat let, dat is openbaer genoch te siene, want ten mach geene rechte vingere behouden. Ende tis oijck wetenlijc te tastene ende die enden der beenen dickent prekelen dat vlees ende die senu-

[p. 60]

wen, ende brengen in groote sweringe, ende alsment raect soo geuoelt men die brijselinge der hoofden vanden beene, dat een ingaende ende tander vuijte, ende men hoort onderwijlen tgeluijt.

Ende ware die broke lancx, men geuoelt die beenen beroeren alsmen daer op duwet ende oijc die oneffenissen ende die grootheijt des beens binnen, alsijse wat opheffen oft op lichten.