Cirurgia of Hantgewerck int lichame der menschen

59. Wat salmen doen als die borst is gewont ?

(p. 113)

Ic sal besien oft die wonde al doirgaet oft niet, ende en gaet sij niet dore, soo is die cure licht te doene, maer gaet sij dore soo sal ic besien oft daer eenich let is gequetst. Ende en is daer geen let gequetst ende die wonde dore gaet, soo dat ic wel weet met tastene ende daer vuijt coempt locht ende opblasinge ende adem, dan soo sal ic naden nieuwen meesters die wonden vergaderen ende toe luyken ende naijense soo datter geene locht vuijt comen en mach, soo dat men den gheest ende die natuerlijke hitte binnen houden mach.

[p. 52]

Ende bijder consten inder vergaderinge salmen wachten dat geene coude locht inde wonden en mach comen, ende dan soe leg ic daer op plumatiolen, genet in wermen wijne, ende bindet alsoo, maer naden a(u)deren meesters soo stop ic die wonde met eenre wiken die eene (hoeck) heuet, soo dat sij inden wonden niet en mach glijden ende oijck om datse die adem niet in halen en soude¹.

Ende daer op soo legic een mundi(fi)catijff, ende daer na een consolidatijff, ende daer toe dranck, ende alsoo wordt die wonde gecureert, ende tot elcken vermakene eene wike gemaect, eermen den andere wike vuijt doet, ende vlocx die andere wike genet ende gereet in de stekene, soo datter geene coude locht in en waije, ende so datter geene werme locht vuijt comen en mach.

1 soude : het Hs. heeft souden.