Cirurgia of Hantgewerck int lichame der menschen

58. Wat salmen doen tot wonden der schouderen, der ermen ende welcke sijn die vreeselijxte ?

Ic segge die senuwen gewont te sijne dweers in die schouderen, ende in die ermen onder die oxel, om die snijdinge der muskelen, der lanken ende der senuwen, daer die leden mede beroeren. Ende die coorden die daer sijn in dat vuijterste der muskelen gewont, brengen in spasme oft vreese van spasme oft die doot, ende dat drije vinger mael bouen der junctueren vanden ellenboge ende drije vinger male beneden den ellenboge.

Ende sijn die senuwen ontween maer niet allen, oft geprekelt, dats vreeselijc om die groote sweringe die men onder tijden niet gesaeften en can. Oft men snijt die senuwen ontween met allen, want dat ware beter dan die doot, want alle menkinge sijn beter dan die doot. Daer omme soo salmen die senuwen plaestren ende naijen diffenderende ende saechten binnen den anderen wonden, ende den erm salmen hooge leggen ende die hant, ende dat bloet stoppen vander aderen ende die senuwe salmen geuen haer behoorende medicinen. Ende also den beene, den vleese der junctueren, die nagle, die ende der vingeren, alre droochs medicine na dattet is droochste let, soo behoort hem met rechte toe.