Cirurgia of Hantgewerck int lichame der menschen

[p. 43]

35. Welck sijn die wonden die van noode sterfelic sijn ?

Het sijn die wonden der herten hoe cleene dat sij sijn, ende die aderen organice doirgaende ende tracea arteria drijden cartillen, ende die wonden van ysophago ende die wonden der longene, ende die wonde des cappen der herten, ende die wonden der grooter harterien, ende die wonden der diafragma, ende die wonden bijden monde vander magen, ende die wonden der leueren, ende die wonden der gallen, ende die wonden der aderen talis splenis, ende die wonden der cleene dermen, ende die wonden der derms jeiunum, ende die wonden der nieren, ende die wonden der blasen bij den bodem doirgaende, ende die wonden in die holheden der moeder. Dese leden gewont in merkelijker grootheden oft met verliese der substancie : die wonden der hersenen ende die wonden des ruggen mercks. Ende sijn dese wonden vuyter maten groot als die die¹ al aff geslegen of een arm pistel of geslegen ende die wonden nauolgen(de) : groote frutsuringen eens groots lets, vuyte stortinge des marchs als metter knie schenen, ende drije vinger mael onder tknie ende drije vinger mael bouen tknie. Ende dies gelijke onder den ellenboge ende daer bouen als die wonden sijn van eeniger grootheden.

1 die die : het dijbeen.