Cirurgia of Hantgewerck int lichame der menschen

31. Wat suldij doen als die senuen in handen oft in anderen leden gefrutseret sijn ?

Ic doe als voirseit, sijn daer geene wonden, maer sijn daer wonden, soe leg ic nijet dat pultes voirseit, want tware den senuwen quaet ende tsouse doen vervuijlen ende inbrengen vreese van crampe. Maer ouer¹ dat pultes soo leg ic witten termentijne in tusschen twee lijnen doeken ende die maectmen aldus.

Neempt termentijn ende lecten in schoonen watere ende roerten altoos met eenre tintel tot dat hij wit genoch is. Ende als die vloinge der humoren gesocht is, soo maec ic een plaester van bonen meel, pic ende seem, al een luttel te gader gesoden, ende daer op een plaester geleet. Ende als die sweringe gecesseert is ende die swellinge gemindert is, soe coem ic totter suyueringen met deser mondificatiue².

Recipe mel rosaet wel gecoleert ende gerste bloeym ende witten termentijn, elcx euen vele, subtijliken te gader gesoden, altoos roerende dat niet en berne; van desen een plaester daer op geleet ende dit soo proeft Galienus ende (Lan) franke dattet goet is in alle senuwen die gewont sijn. Ende niuwe frutsuringe sonder wonde, daer toe salmen maken heeten wijn met soute, ende netten daer in stoppen,

1 ouer : in de plaats van.

2 mondificatiue : het Hs. heeft mondificatien.

[p. 42]

ende leggen soo daer op also heet alsmen gedoogen mach. Ende die verwonde quetsuere¹ sonder etter ende sonder veel seers wort aldus gecureert, ten ware inden voet : daer op soo salmen plaesteren asschen van wijngaerde, gesoden met wijne ende met asijne, ende ic sal dat let baden in loogen van wijngaert asschen ende water daer aff gemaect.

1 quetsuere : het Hs. heeft quetsueren.