Veelderhande schriftuerlicke nieuwe liedekens, vermaninghen, leeringhen, ghebeden ende lofsanghen
(1598)–Leenaert Clock–
Auteursrechtvrij
[pagina 437]
| |
Gods Gheest wil ons gheleydenGa naar margenoot+
En ons berader zijn.
En als wy dan nae desen
Ghescheyden zijn van een,
Soo laet ons doch Godt vresen
In’t leven al ghemeen.
En houden in ghedachten
Het lieffelijck vermaen,
En neerstelijck betrachten
Dat wy hebben verstaen.
Souden wy gaen verghetenGa naar margenoot+
Dat hier nu is gheschiet,
Wat soud’ ons dan het weten
Baten? met allen niet.
Ghenuechde die wy vaten
Deur ons liefs Heeren woort,
Ist dat wy hem verlaten,
Wat salt ons helpen voort.
En daerom houdt in hoede
Dees deuchden allegaer
Die ons nu zijn te goede
Voortbrocht int openbaer.
T’moet nu ghescheyden wesen,
Ten is ons gheen jolijt,
Adieu vrienden ghepresen
Tot op een ander tijt.
Ons bycomst moet gheschieden
Met vreucht alst Godt behaeght,
Adieu ghy lieve lieden,
V doch vromelijck draeght.
Nu wy met den lichame
Scheyden, laet u ghemoetGa naar margenoot+
By ons blijven bequame,Ga naar margenoot+
D’ons’ blijft oock by u soet.
Int lest sonder vermincken
Zijnde in u ghebet,
Soo wilt onser ghedinckenGa naar margenoot+
Vyerichlijck onbelet.
| |
[pagina 438]
| |
Scheyden doet ons nu trueren,
Het schijnt ons heel onsacht,
Adieu tot desen uren,
Godt gheef u goeden nacht.
|
|