Het groote liede-boeck
(1625)–Leenaert Clock–
AuteursrechtvrijOp de wyse: Van Iephtha.
ALs ick ghedenck o Vader mijn
Die goetheyt dijn,
Dat ghy ons hebt weder ghebaert
| |
[Folio Ggg5r]
| |
Tot die hoope verheven
Die namaels sal worden verclaert
Int eeuwich leven.
Een eeuwich leven sonder ent
Sullen die bekent,
Ontfanghen in des Hemels pleyn
Die nu de zonde sterven
En daer toe al sijn goet ghemeyn,
Namaels beerven.
Voor al tracht niet na gelt noch goet
Maer overvloet,
Rijckdom in 'sHemels wesen claer
Dat eeuwelijck sal duyren
En sal ghegheven worden daer,
Die hier nu truyren.
Keeren nacht en dach hare zin
Na dat ghewin,
Ghelijck den Ouden Tobias
Sprack tot sijn Soon verheven
Mijn kindt en acht niet dit ghewas
In dit leven.
En leyden een arm leven bloot
Namaels veel goet,
Sullen wy ontfanghen met vreucht
In dien dat wy Godt vreesen
My dunckt dat my mijn hert verheucht,
In dit wesen.
Ghelijck als Paulus sprekende is
Ick weet ghewis,
Als ick dit aertsche huys verlaet
Een Hemels sal ontfanghen
Ia gelt noch goet daer niet toe baet,
Een recht verlanghen.
Een recht verlanghen naer 'tHemels goet
Mijn herte doet,
Ter huys te zijn by onsen Heer
| |
[Folio Ggg5v]
| |
Die my heeft uytvercooren
En sal verlaten nimmermeer,
Dies nieus ghebooren.
Ras loopt den armen mensch ghewis
Die vergancklijck is,
Om 'tgene dat hier blyven moet
En niet en mach behouwen
Die soo sijn tijdt verslyten doet,
Salt namaels rouwen.
Brandende sal het al vergaen
Niet sal bestaen,
Met groot gheluyt en kraken seer
Moetet hier al verdwynen
Als comen sal den Heer der Heer,
Elck moet verschynen.
Een groot loon sal die ontfaen
Die hier voort gaen,
Tot aen het eynd' volstandich strijdt
Sal die croone verheven
Die hier des Heeren name belijdt,
Worden ghegheven.
Nu laet ons verblyden seer
Al in den Heer,
Want hy sal spreken over luyt
Comt o mijn uytvercooren
Comt voort o ghy mijn lieve Bruyt
Die nieus ghebooren.
Sal ontfanghen eenen loon
In 'sHemels Throon,
Een Hemels huys vercryghen voort
Voor dit aertsche verderven
Daer nimmermeer weenen ghehoort
Dan vreucht verwerven.
Daer't eeuwelijcken duyren sal
Een bly gheschal,
Een vrolijck gheluyt der Engelen siet
| |
[Folio Ggg6r]
| |
Een vreuchde sonder eynde
Sal daer wesen na Schrifts bediet
Voor sijn bekende.
Stadich laet ons sonder verbeyt
Het onderscheyt,
Aenmercken van den vroomen siet
Oock die den Heer niet vreesen
Comt ghy ghebenedyde seyt
Die Heer ghepresen.
Hy sal spreken met groot ghetier
Gaet wech van hier,
Noyt en heb ick u ghekent
Gaet int eeuwich verderven
Daer niet is dan pijn en elent
Een eeuwich sterven.
Zijt bevolen Godt onsen Vaer
Die u bewaer,
Te wandelen nu synen pat
Na Ierusalem verheven
Te blyven inne die schoone stadt,
Int eeuwich leven.
|
|