Het groote liede-boeck
(1625)–Leenaert Clock–
AuteursrechtvrijOp de wyse: Christen Kerck weest wel ghemoet, ofte van Munster, ofte van den Linden Smidt.
INt hooren van Gods heyl'ghe woordt
Laet ons neerstich alsoo 't behoort,
Dat ghetroulijck bewaren,
Dat daer van vruchten comen voort
Hier namaels te vergaren.
Ach (Heer) dat wy moghen daer deur
Worden een nieuwe creatuyr
Van boven nieuw ghebooren,
Gantsch omghekeert als een kindt puyr
Nae u beelt uytvercooren.
Noch gheeft (lief Heere) metter spoet
Dat wy daer deur worden ghevoet
| |
[Folio Fff5r]
| |
Opwassen en vermeeren,
Int wesen Christi wel ghemoet
Tot lof van uwer eeren.
Laet dit als eenen spiegel bet
Voor onse ooghen zijn gheset
Dat wy sien ons' mismaken,
Ons suyveren en wasschen net
Reyn voor u te ghenaken.
Alsoo dat ons' ziele verwont
Door u woordt (Heere) wordt' ghesont,
Ghemaeckt ende verbonden
En wy levende t'alderstondt,
Voor u worden bevonden.
Maeckt u woordt in ons crachtich meest
Tot dat het scheyde ziel en Gheest,
Ons gheeft Hemelsche zinnen
Dat wy die weerelt onbevreest,
Met cracht moghen verwinnen.
Met sijnder cracht ons maeck bereyt
Nam wech alle cleynmoedicheyt,
Yverich tot goede wercken
Ons maken, en in den arbeyt
Becrachtighen, verstercken.
En dat wy soo ootmoedich fijn
Verneert, heel, neder crachtich zijn,
Gheneycht tot medelyden
Met eenen barmhertighen schijn,
Int weldoen ons verblyden.
Recht wapent elcken als een helt
Nu wy ten stryde zijn bestelt,
Met uwen woorde crachtich
Soo moghen wy 'svyants ghewelt,
T'overwinnen zijn machtich.
Tot dat wy comen in het Landt
Bewaert ons (Heer) doet ons bystant,
Op u willen wy bouwen
| |
[Folio Fff5v]
| |
Dat ghy ons deur u stercke handt
Vws woordts sult onderhouwen.
Soo roepen wy u daerom aen
Dat ghy u woordt, het soet vermaen,
Doch in ons' hert wilt schryven
En dat het dach en nacht ghedaen,
By ons mach dadich blyven.
Volherdende verwintmen.
MY lieve Broeder, ende mede-Dienaer in den Heere Ian Lammerts. Dit Liedeken heb ick voor u op die letteren uws naems ghedicht, op dat ghy tot eenen Ghebedt-Liedeken ghebruycken, ende nae het ghepredickte woordt te samen ghebruycken meucht, om genade te vercrygen, dat het ghepredicte woort Gods mochte crachtich ende dadich in den toehoorders worden, ter eeren Gods moet het ghesongen ende ghebruyckt worden, het is uyt hertelijcker liefde gedaen, neemt het int goede, ende weest te samen metter l. Huysvrouwe en alle Vrienden by u hertelijck ghegroet. Den Heer in ghenaden, ende my uwen neerstighen Ghebeden bevolen.
Datum Schoonhoven 1616. den 5. Iulij. By my uwen Broeder ende alder menschen zielen liefhebber
LENAERT CLOCK. |
|