Het groote liede-boeck
(1625)–Leenaert Clock–
AuteursrechtvrijOp de wyse: Mynen Gheest die heeft altijdt verlangen. ofte: van de 10 gheboden.
HEer mijn Godt wilt mijnder ghedincken
Ontsteeckt die saken doch in my
Waer deur mijn liefde mach ontfincken
T'uwaerts, nu met ghemoede bly.
En leert my u goetheyt recht smaken
Deurgronden en te recht verstaen,
Die ghy't mywaerts in alle saken
Bewijst, en aen my hebt ghedaen.
Noch meer, hoe weynich d'aertsche dinghen
By u Godt te ghelijcken zijn,
Gantsch nietich in al haer omringhen
Ia ydel, en maer eenen schijn.
Recht leert my Heere nu uytroeden
Des vleysch, en d'eyghen liefden blint,
Dat ick daer in mach neerstich spoeden,
Maeckt my ghestadich soo ghesint.
Ia leert my mijn herte bewaren
Dat ick geen zonde groot noch cleyn,
En volbrenghe t'mynen beswaren,
Ga naar margenoot+Want zond' scheydt u en my van eyn.
In anghst des herten leert my roepen
En suchten tot u lieve Heer, Tot u liefde
mocht overlopen In mijn herte nu even seer.
Claerlijck leert my hier ondersoecken,
Die conscienty maken vry,
En reyningen in alle hoecken
Wat hier van my mishandelt zy.
| |
[Folio Ccc2r]
| |
Kloeck leert my die werelt verlaten,
Oeffenen in GodsalicheytGa naar margenoot+
Dat ick u liefde recht mach vaten,
D'aertsche verachten met bescheyt.
Voor al leert my al uwe wercken
Bedencken als van u ghemaeckt,
Dat ick die sake mach aenmercken,
Waer uyt men uwe goetheyt smaeckt.
Aendachtelijck u daerenboven
Als wy die soo bekennen wijdt,
V daerom dancken ende loven
Als onsen Godt ghebenedijdt.
Noch leert my Heer, ghedencken stadich
Mijn eyghen ghebreck en misdaet
Ia uwe wijsheyt en beradich,
Voornemen den beteren staet.
Hoe vruchtbaer my die saeck mach wesen
Wilt my te recht maken bekent
En mynen schaed' soud' zijn in desen,
Mis ick die liefde excelent.
Al 'tgeen dat liefde mach verwecken
T'uwaerts (lief Heer) leert my perfeckt
Dat al mijn doen daer heen mach strecken,
Verhult 'tgeen dat my noch ghebreckt.
Recht mijn ghedachten Heere vyerich
T'uwaerts, dickwils en menichmael
Leert mijn handen opheffen tierich,
'Theert in den Hemel principael.
En laet my dit voornemen houwen
En aflaten tot geender stondt
Tot ick u liefde mach aenschouwen,
Bevinden in mijns herten grondt.
Nu Heer ghy kent u schepsel dadich
Hoe cleyn ick van vermoghen bin
Daerom o Godt weest mijns ghenadich
En sterckt my doch in desen zin.
|