Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse: Een heerlijcke kroon is nu te winnen.
O Menschen aenhoort doch ghy creatueren
En wilt betreuren, u sonden al:
Want het naect seer den dach des Heeren
Die met verseren haest comen sal,
Om dan elck een te loonen
Na dat hy heeft ghedaen,
Goet oft quaet wilt verstaen
Niemant mach hem dan verschoonen.
Die goede sullen blyschap ontfanghen
En met verlanghen, werden ghecroont,
Verlost bevrijt van vreese banghen
Die hier zijn gangen, ter deucht betoont:
Maer de quade met schanden
Sullen int helsche vier
Vol pijn en zwaer dangier
| |
[pagina 147]
| |
Gaen daert eeuwich sal branden.
Och laet ons dit te recht aen mercken,
En in goe wercken, altijt voort gaen
En den Heer bidden dat hy wil stercken
In s'werelts percken, ons ganc voortaen,
Op dat wy niet en comen
Hier na in droefheyt groot,
In de eeuwighe doot,
Ende het zwaer verdomen.
Maer dat wy hier na mochten geraken
Tot ons vermaken, in s'Hemels tent,
Daer blijtschap is in alle saken
Des laet ons waken tot inden ent,
En nochteren zijn bevonden:
Want ons weder perty,
Gaet om soecken of hy
Hier yemant mocht verslinden.
Dien wederstaet stercklijck en blijden
In desen tijde, int gheloof vast
Op dat ghy daer van niet gaet glijden,
Oock tot u lijden niet wert verrast
Ende verliest in desen
Van dat ghy hebt ghewracht,
Ende hier hebt volbracht
Maer vollen loon crijcht ghepresen.
Dringt nu, dringt nu met gewelt binnen
Met stercke sinnen, u dapper stelt,
Al ist dat d'werelt u lockt tot minnen
Niet met haer inne, gaet want het ghelt
V t'leven wilt aenschouwen
| |
[pagina 148]
| |
Soo Salomon schrijft claer,
Daerom gaet niet met haer
Anders comt ghy in rouwen.
Het rijck der Hemelen moet gewelt lijden
Aen alle sijden tis openbaer,
En die gheweldighe tot allen tijden,
Sonder vermijden nement tot haer
Dus gaet door d'enghe poorte,
Ende op den wech smal
Wort van s'Heeren ghetal
Betracht de nieu gheboorte.
Want ten sy dat ghy zijt wederboren
O mens wilt hooren, soo Christus seyt,
Of ghy meucht niet zijn uytvercoren
Maer blijft verloren des niet verbeyt,
Op dat ghy dan seer schoone
Hier na meucht zijn verheucht,
Vol blijschap ende vreucht,
Ende ontfanghen de croone.
|
|