Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse: Gheeft my te drincken na mijnen dorst.
DAer staet gheschreven openbaer
Mattheus sestien soo wy lesen,
Dat die wil volghen Christo naer
Moet versaken zijn eyghen wesen,
Op hem nemen zijn cruys ghepresen,
Noch oock by desen, een claer bediet,
Dat die zijn leven hout gheresen
Die salt verliesen nu wel toe siet.
Want een mens quaet
In zijnen raet,
Die zijnen aert behout // betrout
| |
[pagina 130]
| |
En heeft meer lust
Int aerts onrust
En soeckt schat ende gout.
Maer Christus hoort na dit bescheyt
Gaet ons met ghelijck'nis bedieden,
Hoe dat het Hemelrijck planteyt,
Niet is ghelijck als Mammons lieden
Die dat oncruyt niet uyt en wieden:
Maer men moet vlieden // giericheyt quaet.
En als Coopman Peerels ghenieden
Het aerts verlaten tis Christus raet
Die aert vant vleys
Die soeckt sijn eys,
Maer tis hem selven quaet,
Die staet,
Die doot ist loon,
Des werelts schoon,
Haer gheschiet gheen ghenaet.
Die werelt gheensins en bemint
Noch yet van tgheen dat daer is binnen,
Want het is lust dit wel versint,
En mach by Godt gheen stede vinnen,
Dus staet al na Hemelsche sinnen,
Soeckt t'overwinnen // de werelt snoot,
Op dat u Satan niet mach ginnen
En u gheleyde inden doot.
Want wie versaecht,
Niet vroom en jaecht,
Om volcomen te zijn // in pijn
Wil zijn dat deel
| |
[pagina 131]
| |
Der Sondaers veel
Die gaen na s'Werelts lijn.
Ghelijck als voren is verhaelt
Te versaken zijn eyghen leven,
Die moet door liefden onghefaelt
Comen tot Godt alleen verheven:
Hierom hebt Godt lief sonder sneven
Dient hem met beven // van herten reyn
Van gantscher zielen hier beneven
Moet ghy lief hebben d'Heer alleyn.
Maer wie bemint
Of aerts ghesint
Is so Iohannes leert // verkeert
Godts liefde siet,
Is in hem niet
T'vergaet al metter veert.
Wie nu lief heeft so is verhaelt
Godt boven alle dinck op aerden,
Of inden Hemel onghefaelt,
En hem recht eert als den vermaerden,
Die sal oock zijn naesten in waerden,
Christo verclaerden // ghelijck als hem
Selven, dus soo wilt nu aen vaerden
Te hooren altijdt Christus stem,
Maer wie noch yet,
Bemint t'gheniet
Vader, Moeder, of Wijf, of Lijf
Huys, Hof, Lant, Sant,
Neven valjant
Christo, ten heeft gheen clijf.
| |
[pagina 132]
| |
Dus moet het al verlaten sijn
Wt Liefden om met Godt te wesen
Daer ghelt gheveynstheyt nochte schijn,
Die Liefdt moet boven al gheresen,
Want sy het meest is soomen lesen,
Seer hooch ghepresen, is haren naem,
Door liefd' heeft Christus ons genesen
Hy maeckt ons tot sijn rijck bequaem:
Hou souden wy,
Nu noch sijn bly
In s'werelts lusten snoot // gans doot,
Met sijn qua aert,
Dus niet en spaert
Eer dat ghy comt in noot.
| |
Pause.Die Liefde moet sijn onbesmet,
Want Christus heeft ons sonder falen,
Voor gaen en heeft vervult de Wet,
En onse sonden gaen betalen
Die voor waren na Schrifts verhalen
Doen wy met qualen // waren belaen
In doots benou en Helsche dalen,
Maer nu sijn wy ghenomen aen:
Maer wie noch blijft,
In sonden stijft
En niet tot Christo keert // bezweert,
Die crijcht hier naer,
Veel pijne zwaer
Soo ons de Schriftuer leert.
Dus sijn wy uyt Liefden alleen
| |
[pagina 133]
| |
Verlost bevrijt en quijt gheschouwen,
Van Christus ons Heer anders gheen,
Dus set op hem al u betrouwen,
En gaet u vast op den steen bouwen,
Dat ghijt benouwen // moghet ontgaen,
Hebt ghy het recht soeckt te behouwen
Dat ghy ten ende toe blijft staen:
Maer veel den naem,
Christen bequaem
Voeren sonder de daet // wat raet
Twas beter niet,
Dat ghy soo hiet
Het is u te meer quaet.
Waer sal den achter clapper quaet
Verschijnen of sijn plaetse vinnen,
Of de gheveynsde boos van raet,
Of gierighe na aertsche dinghen,
Of leughenaers en woeckers winnen
Salt vier haer ginnen // huylt ende weent
Ghy rijcken ellendich van sinnen
V en wert gheenen troost verleent,
O mens altijdt,
Doet uwen vlijt
Te sijn met Christo een // gemeen
Soo wert ghy vry
Van namaels ly
Dit soeckt en anders gheen.
Godt sal zijn volleck wel bevrijn,
Die sonder smette leeft op aerden
Eeuwich sullen sy haer verblijn,
| |
[pagina 134]
| |
Met Godt sullen sy sijn in waerden,
Hy sal vercieren sijn ghebaerden,
Na Schrifts verclaerden // suyver dijvijn
Dus wilt u haestelijck heen vaerden
Mijt ter werelt al boose schijn,
Besluyt hier mee
Wandelt in vree,
Want kijvachtighen veel // geen deel,
In Godes rijck,
Dus al ghelijck
Wandelt oprecht gheheel.
|
|