Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse: Nu laet ons allegaer danckbaer zijn.
O jonghe Ieucht seer dom van sin
En wulps in u ghedachten,
Die dit leven met quaet begin
Misbruyckt in uwe crachten,
Dit doch nu met my wel verstaet:
Wat smerte dat comt uyt het quaet
Daer in ghy u gaet baden,
Och wilt u wel beraden.
Want Godt die isset al bekent
Wat wy hebben bedreven,
Al inde duysterheyt verblent
In de daghen ons leven,
Daerom wilt hertelijck met mijn
Bidden der zielen Medecijn
| |
[pagina 117]
| |
Dat hy wil zijn ghenadich
Ons, ende oock weldadich.
So ghy nu tot eenigher tijt
V selven wilt beproeven,
Ghy sult claer bevinden subijt
De sond' t'ghemoets bedroeven:
Waer door is ghecomen de doot,
Wel eer in cleyn en oock in groot
Die wy meest volghen mede:
Met qua sondighe zede.
Des werelts leven ende lust
Dat wy met groot begheren,
Hier nu soecken vol van onrust
Dat doet de ziel turberen,
En vervult haer met grooten strijt
Door quade lust en appetijt,
T'bezwaert ende baert lijden
Meer dan het brengt verblijden.
Het quaet dat is veel beter hier
(Tot glory ende eere)
Te sterven door t'versakens vier
En des cruycens purgeren,
(Twelck wel vermach de liefde reyn
Waer door men Godt bemint alleen)
Dan namaels teeuwich sterven,
In der hellen te erven.
Hadden wy maer nu eens ghewaecht
T'sterven der quaer natueren,
In plaetse dat ons wel behaecht
Hier d'aertsche creatueren,
| |
[pagina 118]
| |
Hoe gherustich vry ende bly,
Soude men sijn aen allen sy
Verlost sijnde van schanden,
En dese aertsche banden.
Prince ende princessen schoon
Gheeft de moet niet verloren,
Denckt Godt heeft de zwacke als soon,
En de crancke vercoren
Keert weer, keert weer, tis meer dan tijt
Dat ghy meucht sijn in Godt verblijt,
Soo sal hy u ghenaecken,
En sijn Liefde doen smaecken.
|
|