Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest

Het eenendertighste Liedeken, een Bruylofts liet, ofte
een gheluckwenschinge in den Houwelijcken staet,

Op de wijse: Lief uytvercoren ick socht u seer,

[p. 67]

 

GEluck en vrede

 

Wensch ick u siet,

 

Die hier ter stede

 

Hebben met vliet

 

Haer nu begeven

 

In d'echten staet:

 

Die Heer verheven,

 

Tot uwer baet,

 

Die wil u coen,

 

Segheningh doen,

 

Op dit seysoen,

 

Dat u niet qualijck gaet.

 

Dees staet ghepresen,

 

Van God seer wijs,

 

Is soo wy lesen,

 

Int Paradijs

 

Inghestelt weerdigh,

 

God schiep bequaem,

 

Adam goet eerdigh

 

En gaf hem saen,

 

Een hulpe jent,

 

Tot sulcken ent,

 

Dat sy bekent,

 

Soude God dancken gaen.

 

Ghy twee te samen,

 

In d'echt ghepaert,

 

Hebt liefd' bequaemen,

 

Malcander waert,

 

Soo sal de Heere,

 

Aen allen cant,

[p. 68]

 

V seeghnen seere,

 

Dan tryumphant:

 

V kind'ren fijn,

 

Sullen hoort mijn,

 

Als spruytjes zijn,

 

Aenden Wijnstock pleysant.

 

Wilt oock beminnen

 

V Huysvrou soet,

 

Met hert en sinnen,

 

In u ghemoet,

 

Als Christus vooren,

 

Oock heeft ghedaen,

 

Sijn Bruydt vercooren,

 

d'Ghemeente saen,

 

O liefde groot,

 

Hy heeft den doodt

 

Voor haer minjoot,

 

Ghestorven seer belaen.

 

Vrouw Bruyt oock sedigh,

 

V man aencleeft,

 

Weest met hem vredigh,

 

Hem eere gheeft,

 

Een vrientlijck weesen,

 

Hem doch toe draeght,

 

En hem wilt vreesen,

 

Oock niet beclaeght,

 

V man voortaen,

 

Weest onderdaen,

 

Wilt soo voort gaen,

 

Als Sara heeft ghewaeght.

[p. 69]

 

Oorlof ghy Prince

 

Bruydegom weert,

 

Met u Princesse

 

Vrou Bruydt vermeert,

 

Wilt het ten lesten,

 

In danck ontfaen,

 

Houtet ten besten,

 

Ons slecht vermaen,

 

De Heer seer goet,

 

Gheeft liefde soet,

 

En u voorspoet,

 

Dat gheef u God bequaem.