Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
Auteursrechtvrijop de wijse; van den 88. Psalm, Heer die my dus langh hebt, etc.
TReet nu doch na de schoone stadt,
Ghy lieve jeughde al te samen:
Wilt doch wandelen naet betamen,
| |
[pagina 60]
| |
In desen tijd den smallen padt
Want die sal u leyden ten leven,
Ghelijck wy claer vinden beschreven.
Yverigh wilt doch wel beraen,
Sonder omsien nu steets voort treden,
Op desen wegh die u tot vreden
Sal brenghen, soo ghy vroom hout aen:
Daerom wijckt niet af in dees daghen,
Maer wandelt voort sonder vertraghen.
Nu die Heer door sijn goetheyt reyn,
V gheopenbaert heeft seer goedigh
Zijn wegh, en oock sijnen wil spoedigh
V daeghlijcks laet hooren ghemeyn:
Wilt doch o lieve jeught vercooren,
V hier na schicken naet behooren.
TGEN u noch hindert op dit pas,
Om te leven na Gods begeeren,
Dat wilt doch altijdt van u weeren:
Ende u nu begeven ras
Om uwen Bruydegom verheven,
Stedigh met lust en liefd' t'aencleven.
GEReet maeckt u oock altesaem,
Als wyse maeghden seer bequame:
Op dat ghy meught zijn aenghename
V Bruydegom die u bequaem
Als dan sal nemen seer vreucht-rijcke,
Voor syne Bruyt seer autentijcke.
RIcht daer om al u ganghen fijn
Nae sijnen wil tot allen stonden,
Op dat ghy meught worden bevonden,
| |
[pagina 61]
| |
Van die schaepkens die tallen tijn,
Die stem haers herders vlytich hooren,
En volghen hem soo hy gaet vooren.
Toont u hier in als kinders goet,
Ws vaders wille te betrachten,
Zijn wet wilt steets in u ghedachten
Draghen, dat ghy altijt seer soet
Daer dagh ende nacht meugt van spreken,
En soo die boomen zijn gheleken:
Staende aen het water gheplant,
Die haer vruchten tot allen tijden
Voort brenghen, steets sonder vermijden
Ter bequamer tijdt seer playsant,
Diens bladers nimmermeer verdrogen,
Maer steets bloeyen voor smenschen ogen.
Dus moeten de Gherechtighe
Oock steets in deught bloeyende wesen,
Op dat haren vader door desen,
Mach crijghen sijn rechte eere:
O jeught wilt u doch hier toe spoeden,
Seer neerstelijck als de vroeden.
OCH wilt doch tsamen met aendacht
Altijdt neerstigh bidden en waken,
En u soo stedigh bereyt maken,
Op s'Heeren toecomst dagh en nacht,
Op dat als hy u comt besoecken,
Ghy meught bereyt zijn als de cloecken.
Totter bruyloft seer excelent,
Al met uwen Coninck seer schoone
In te gaen, seer lieflijck ydoone,
| |
[pagina 62]
| |
Boven al in des Hemels tent,
In die weerschap wilt dit doch vaten,
Daer vreught sal wesen boven mate.
Eerlijcke gasten sullent fier
Moeten zijn, die daer sullen moghen
Staende blijven, want s'Heeren ooghen
Die zijn soo reyn, hoort dees manier,
Dat sij't besmet noch onreyn waerlijck
Niet en moghen aenschouwen claerlijck.
Rust u daerom met neerstigheyt,
Dat ghy met t'rechte cleyt seer pueren,
Bereyt meught zijn tot alder ueren:
En soo u Heer doch nu verbeyt,
Soo sal hy u tot uwen loone,
Hierna geven des levens Croone.
Van reyner liefden is dit Liedt,
Op u begeert aen u gheschreven:
Stedigh wilt den Heer den prijs geven,
V en laet daer van wenden niet,
Soo sult ghy met Gods uytvercooren,
Namaels eewichlick vreught oorbooren.
|
|