Mastreechter versjes en leedsjes (onder ps. P.C.d.B.)

[p. 28]

Mastreechter beer

Mastreechter beer,

Wat zeen iech tiech geer

Bij miech op et täöfelke stoon;

Mien heerelik voch

Allein van de loch

Dao kin iech al haos van bestoon.

Mie lekker glaas aajd

Van hop en van maajt,

Wie köstelijk is tienen drònk,

Wie dònkel bis tiech,

De zusterke liech,

Um neet te vergeete et jònk.

Wat bis tiech bekwaom;

De maakdes te naom

Van us toch zoe wereldbekind,

Want tien kwaliteit

Gein beter besteit;

De weerga van diech me neet vind.

De blijfs euzen trots

Zoe vas es en rots,

De deils eus plezeer en sjagrijn;

De werrems eus blood,

De giefs us weer mood,

Verzachs ouch, zoe nuudig, de pijn.

Ontrint alle daog

Door wètte geplaog

Verlange ze mer nao die liek;

Toch spanste de kroen

En zits op ten troen,

Blijfs keuning in Limburg's Riek.