Silenus Alcibiadis, sive Proteus

(1618)–Jacob Cats– rechtenstatus



[Folio *****1r]
ghedicht Ter eeren Den hoogh-gheleerden D.I. Cats op sijne Const-rijcke Sinne-beelden. GHelijck den Medecijn aerd-sinnich doet bereyden Sijn bitter-heelsaem cruyt, met een versoeten schijn, Om, door een vroed bedrogh, den siecken aen te leyden Tot den bequamen wegh, als die onwillich zijn: Soo gaet den wijsen CATS ons onghetemde jaren Aen-voeren tot de tucht, door 'tlock-aes van de Min, En brengt de wijhe deught, die qualijck was te paren Met de bloet-rijcke jeught, vermomt en sluypend' in; En leert, met aerdich dicht, hoe met verloop van tyden De Minn' tot Eeren-sucht, de Eer tot Gods-dienst climt; En hoe de Defticheyt en Geylheyt t'samen stryden, Hoe dat den laetsten stant, den eersten over-glimpt. Ten was gheen dertel vier, 't welck hem heeft aen-ghedreven Te beelden in 't begin vrou Venus, of haer kint, Maer door een hoogher Vier gheprickelt, heeft beschreven Hoe dat de liefde Gods de weereltsch' overwint, Als hy in dicht, en prent, seer konst-rijck weet te malen En drucken onsen aert en onse zeden af, Wel drie-mael dobbel eer moet hy te recht behalen, Die Zeelant, op een dagh, een cleyne Weerelt gaf. L. Peutemans.