Alle de werken. Deel 2

Uyt Plautus:

Het minnen is een seltsaem spel,
Het brenght den minnaer in gequel,
Het is een loss' een loose vont,
Het is een wesen sonder gront:
Al wat men aen de vryers raet,
Dat dunckt de jonckers enckel quaet,
Doch wat hun afgeraden wert,
Daer henen wil haer grilligh hert:
En wat men soo een lincker biet,
Dat wil hy doch sijn leven niet;
En wat hem niet gebeuren mach,
Daer haeckt hy na den gantschen dach;
Roept yemant soo een vijsen quant,
Gewis die wijckt hem van der hant,
En schoon hem yemant henen sent,
Hy is stracks weder daer ontrent;
In 't korte, 't is een wreede pijn
In Venus hof verdoolt te zijn.