Diversche liedekens

Een nieu Liedt, op de zeuen ween.

LAet louen dy, wien d’Jnghels louen,
Ghy zijt Gods weerdste bruyd verheuen:
Onslien bringhd ghy ten Hemel bouen,
Dies hebdy groot verdriet beseuen,
Noyt vrouwe en leedt sulck grief int leuen.

Wat leedt ghy drucks Maria vrouwe

Deur Symeons schoon prophetyen,

[p. 74]

 

Doende verclaers, dat tsweerd van rouwe

 

Dijn eyghen siele sou duersnyen,

 

Groot last quam dy, veur cleyn verblyen.

 

 

 

Hoe vendy v int fel beswaren

 

Alst Herodes dede becoopen

 

Al den kinders onder twee iaren,

 

En ghy moest naer Egypten loopen,

 

Dijn last groeyde met grooten hoopen.

 

 

 

Wat hadde v ionck lichaem toren

 

Als ghy en Joseph bee vul minnen

 

Dijn kindt waendet hebben verloren,

 

En ghy hem vondt ten Tempel binnen,

 

Sonder Gods troost ghy moest ontsinnen.

 

 

 

Wat haddy gru en swaer mishaghen,

 

Wat leedt dat herte bitter nepen

 

Als ghy dijn kindt saeght tcruyce draghen,

 

Ende hem ter doot by fortsen slepen,

 

Gheen mensch’ en had dit grief begrepen.

 

 

 

Met droefheyt groot waerdy bevanghen

 

Swaer persse bracht dijn herte t’onder,

 

Als ghy hem saecht aent cruyce hanghen

 

En ghy en Jan bee stondt daer onder,

 

Ghy en const verstaen dit bittter wonder.

 

 

 

Hoe anxtich waerdy van bedryue,

 

Hoe sneet den point van d’Bisschops sweerde,

 

Als ghy hem gherooft saecht vanden lyue

 

En van tcruyce gheleyd op deerde,

 

Ghy wist, aen hem hinc tshemels weerde.

 

 

[p. 75]

 

Wat bitter pijn moest ghy beslauen,

 

Hoe schraudy laes, droef van bewinde

 

Als ghy hem dijns ondancks saeght begrauen

 

En scheeden moest van uwen kinde,

 

Uoor tsweerelts goedt dijn hert hem minde.

 

 

 

Nu bid ick v schoon ieught ten fyne

 

En slaet ons sondaers doch gheen swijcke,

 

Deur groot en smal dijn bitter pyne

 

Bringhdt ons in dijn kindts eeuwich rijcke,

 

Dwelck vul vreughdt is sonder ghelijcke.