Diversche liedekens

[p. 69]

Een ander.XXVIIJ.

O Triumphante vrouwe,
Soethertich zonder zwijcke:
Brocht ghy niet te verzijcke
Dijn dienaers een groot deel
O Uenus root van gouwe
Solaes zonder ghelijcke:
Ghy waert een hemelrijcke,
Een costelijck iuweel:
Jck claeght d’bitter morseel van uwen wreeden zin:
Lustich is dijn prieel waerder geen droefheyd in.

O rieckende roosiere,

Soetmondighe sucade,

[p. 70]

 

Dijn minne coop ick diere,

 

Dat doet dijn onghenade:

 

Jonckvrouwe of icks v bade,

 

Berecht my eer yet lanck,

 

Mach ick dy sonder schade,

 

Niet minnen aenschijn blanck,

 

Tis qualick uwen danck,

 

Soodt blijckt aen mijn verdriet:

 

Den mond wat vreughde schanck,

 

Maer therte en meendes niet.

 

 

 

Ick vinde in al dijn saken,

 

Mijns lichaems fel verbroeyen

 

Een langhen ende een haken,

 

Dwelck my wel mach vernoeyen:

 

Ghy wilt my niet besproeyen

 

Als siet mijn aenschijn bleeck,

 

Druck doedy altoos groeyen,

 

Aen v is gheen verreeck:

 

Uan liefden ben ick weeck

 

Ende al vul onghevals,

 

Wat dient dien loosen smeeck,

 

Dijn zeem is al vul gals.

 

 

 

O balssem soet van gheure,

 

Deurluchtich als granaten,

 

Jck volgh’u byden speure

 

Ghy rieckt bet dan muscaten:

 

Jck en sal v niet laten

 

Als waert v lief of leet,

[p. 71]

 

Hoe soudick v ghehaten,

 

De liefste dien ick weet:

 

Hier hebdy claer bescheet,

 

Ghy blijft met my ghequelt:

 

Die totten fine street

 

Thenden behielt hy tvelt.

 

 

 

Die my toezont dees nope,

 

Als thooft van Uenus throone,

 

Biedt my een beter hope,

 

Sendt my confoort te loone,

 

Of tooghes niet soo schoone,

 

Gh’lijck tCocodril dat weent:

 

Soo edel van persoone,

 

Hoe zydy dus versteent?

 

Als ghy my troost verleent

 

Dan dichtick op een nieu,

 

Ghy weett wien therte meent,

 

Hier met Princesse adieu.