Diversche liedekens
(1574)–Matthijs de Castelein–
Auteursrechtvrij
[pagina 64]
| |
 Dus cant al besproeyen
Den Mey zeer plaisant:
Wien zoude vernoeyen
Den tijt nu veur hant,
Nochtans houdt my de maeght vaillant
Jn haren bant,
Jck drouue an dlant met blyden schyne,
Jck en verheughe an gheenen cant
Deur Uenus brant,
Cause is tschoon lief: tis grooten pyne
Met drouuer herten blyde tsyne.
| |
[pagina 65]
| |
Wien claech ick dit, dan dy lief mordadich
Die my ter doot doet tranich weenen?
Wildy mijn ionst niet vallen ghenadich,
Tooght schoon samblant, als sout therte niet meenen;
Of zydy van steenen
Jnburstich en fel,
So doodt my met eenen
Jck en gheer niet el:
Die v bemindt, valdy rebel,
Ghy wetet wel:
Dit claech ick dy t’allen termyne,
Want ick verlies mijn vreucht en spel,
Noyt sulck ghequel:
Cause is schoon lief: tis groote pyne,
Met drouuer herten blyde tzyne.
Nochtans gheeft my vrou Uenus veel nopen,
Cupidos euel heeft dat inne,
Watt is: den minnare derf wel hopen,
Onvruchtbarighe liefde voet de minne,
Dits cause vriendinne
Uan mijn druckich liet:
Met herten met sinne
Mijn ionst v gheschiet:
Maer laes al ist dat ghy dit siet
Ghy en achtes niet,
Al mijn solaes is wranck als bryne:
Alle ghenoechte is my verdriet
Ureucht van my vliet,
Cause ist schoon etc.
| |
[pagina 66]
| |
Princesse lief, schoon, edel ionckvrouwe,
Jck bid v doch voor alle saken
Met desen Mey bluscht oock mynen rouwe,
Naer v ist dat al mijn vijf sinnen haken:
Lief met dijnder spraken
Als een heunich soet
So meuchdy vermaken
Al mijn teghenspoet:
Uan v en gheer ick om mijn behoet
Gheen ander goet:
Dus niet , druck bringhd my ter ruwynen,
Jck schreye tranen vulle vloet
Deur Uenus gloet:
Cause is schoon lief: tis groote pyne,
Met droeuer herten blyde tsyne.
|
|
