Diversche liedekens
(1574)–Matthijs de Castelein–
Auteursrechtvrij
[pagina 21]
| |
 JCk vrijdd’ een vraukin al soo fijn
En droech haer goede minne,
Die al verteerde tgoeyken mijn,
Want sy was loos van zinne:
Zy zey, comt naer
Schoon lief eerbaer
wy willen vreucht ontsluyten:
Jc ghinc tot haer
om d’aenschijn claer,
Maer thoerken sloot my buyten.
| |
[pagina 22]
| |
Als is mijn mantel zeer ghescheurt
Schoon lief k’en cants besweeren:
Als ga ick ghegaet, ghelapt, gheleurt,
Ghy helpet al verteeren:
Als was ick noyt
Aldus beroyt,
Als draech ick ydel borsen:
Als ist vertoyt,
Uerteert, verpoyt,
Ken ben noch niet verborsen.
Schoon liefkin heb ickt al verdaen,
Peynst op voorleden tyden:
By v heb ick de schade ontfaen,
Laet my doch noch verblyden.
Seght my t’bediet,
Hoe ist gheschiet?
Jck hield v vol van trouwen:
Als heb ick niet,
Alsoo ghy siet,
Noch heb ick wat behouwen.
Prince schoon lief, seght my dat snel,
Wat is dy ouer bleuen?
Schoon lief, dat meuchdy weten wel,
Theeft v veel vreuchds ghegheuen.
Hebdy noch dat?
Ja ick schaec noch mat.
| |
[pagina 23]
| |
En wilt dat niet verliesen:
Jck secht v plat,
Uoor goet oft schat,
Wil ick dat weder kiesen.
|
|