Diversche liedekens
(1574)–Matthijs de Castelein–
Auteursrechtvrij
[pagina 14]
| |
 COnst gaet voor cracht
Lijc d’ ouders ons scholieren,
Steld u nu op, die ryden noyt began.
Toogt vroom dijn vacht
Ende opent tsLeeus bannieren,
Let op tvirtuyt ons welvaert hangter an.
Elck edel man,
Jnt vechten valt zeer coene,
Jnt groene, recht dijn tenten gent,
Maect u bekent, int Urancs conuent,
Daer is profijt te doene.
| |
[pagina 15]
| |
Marchierd gheras,
Uerbeidt noch tijt noch huere,
God gheeft v weder puer naer weynschen kies,
Tis nu rechts pas,
De vruchten zijn in schuere,
Gheen Landman crijght by u als nu verlies,
Gods vriend Andries
Staet u wel te bevroene,
Te spoene, pooght, hoept goeden hent,
Maeckt u bekent, int Urancs conuent,
Daer is profijt te doene.
Spijt ende orgueil
Laet op de Lely commen,
Den Jnghels man steket al omme in tvier
Bouen Monstrueil,
Uoort al dees zye der Sommen,
Mids Terowaen t’rooshuys voor ons onghier,
Blijft int dangier
Als nv zijnd’ in seysoene,
Te goene, dy, ketst ende rent,
Maeckt u bekent, int Urancs conuent,
Daer is profijt te doene.
Sluert niet hier op,
Die zijt van sKeysers soorte,
Trect altijt voort als vindy wederstoot,
Biedt fray den crop,
Tot Parijs voor die poorte,
Met eeren blijfdy voor den Keyser doot,
| |
[pagina 16]
| |
Ureest gheenen noot,
Maer wacht veur Ghuweloene,
Uoor noene, is tfaict meest excellent,
Maeckt u bekent, int Urancs conuent,
Daer is profijt te doene.
D’hooghste van al,
Als Prince bouen princen,
Diet al regiert, en weet al goet en quaet,
Kent elcs gheual,
Jn steden en prouincen:
Dies zal hy u, mits goet recht, gheuen raet,
Sonder verlaet,
Js goet recht wel te doene,
Te bemoene, pijnt zulck accident,
Maeckt u bekent, int Urancs conuent,
Daer is conquest te doene.
|
|