De const van rhetoriken

[p. 225]

[3x Ander vremde snede]

¶ Ander vremde snede.

¶ Blomme der schoonheid, ind tshemels fundatien,
Vul alder gratien:
Schoon Gemme van eeren, zeer excellent,
Met Christo bezittende vul iubilatien
De hooghste statien.
Ghebenedijt zidy, bouen alle vrauwen bekent,
Ghextimeerd, vuer ons meinschen praesent,
Aduocate excellent,
Om ons te brijnghene in Gods secreten.
Vinden wy ons ondancbaer, laes! in den ent,
Ofte siende blent,
En wild ons vuer dijn helig kind niet vergheten.

¶ Ander vremde snede.

¶ Als hadt ghewedt iemend, lijf om lijf.
Int bedde daer een wijf, leid fel execrable
Es altoos zonder blijf, gheschil en ghekijf:
Vvant al huer bedrijf, es abhominable.
Als nu, es zu instable, op de kinders ontsteld.
Nu es zu zonder gheld, of ialours ghequeld,
Ofte zu rebeld, quaed van inbuste.
Vvaert dat haer durste, hoe wel hem qualic luste,
En hy haer min custe, dan naer daude zede,
Bekijct vry, hoe zu den nuese op schuste:
Nemmermeer hebdy ruste, duer smeec noch bede,
Vvelvaerd, paeys, noch vrede.

[p. 226]

¶ Ander vremde snede.

¶ Helpe Gods helighe cracht, alder crachtighst,
Die bouen al, zijd ghehacht, alder ghehachtighst,
Bedacht alder bedachtighst, tsmeinschen profite bloot:
Die ons drucks can een slaken maken.
Tonzer salicheit God, hebdi magt, alder magtigst,
Ende geeft den eeuwighen pacht, alder pachtighst:
Hoe mach ic dus verbliden met tsweerelds iolite groot?
Als die naer idel zaken haken?
Alleene saudic wel int Goddelic blaken naken,
Ten daen verleeders, die mi met haer valsch sermoen voen:
Als icker in ben, moet ic naer tsaeisoen doen.