Mosalect. Bloemlezing uit de Limburgse dialectliteratuur

[p. 264]

[p. 265]

Nae waor, Marie, nae waor?
Roermonds

Zèk, wèts du 't nog... dae zomerdaag?...
'et is al mennig jaor gelejen,
Mer wie alt dè'ch ouch waeren maag,
Det bliift mich bi oet oos verlejen-
De zon stong branjend in de locht
En piilrecht baoven de aerd te glansen;
Gei winjdje goof ei bietje tocht,
Me kos de hitst op 't veljd zeen dansen;
Den hemel waas zoo helderklaor,
Nae waor, Marie, nae waor?

Veer gingen lanzaam door de zanjd
'et veljd in, langs 'et bleuijend kaoren;
Du streelsde 't mit de vlake hanjd
En speelsde mit de hangende aoren...
Veer sproken neet, veer zongen neet,
Veer hadden dao toe ouch gein raeijen...
Veer zochten nieks, mit ooze weet...
Veer gingen mer get zamen traeijen,
Al waas de hitst ouch drökkend zwaor...
Nae waor, Marie, nae waor?

De möggen dansden om os haer,
De krekel had zich heis gezongen...
Du zagst ‘'t gift morgen weer schoon waer’,
En plöksde bloomen, wo ze stongen.
Ich plökde mit, in diine schoot,
En al de bloomen die veer zochten
Höbs du doorein, half blauw en rood
Tot eine bonjte krans gevlochten...
Dae zats du op diin donkel haor...
Nae waor, Marie, nae waor?

[p. 266]

 

De zon zonk neer mit volle glans

 

Wie in ein zee van golje water...

 

Ich zag: ‘Marie, gaef mich dae krans,

 

‘Det ich 'em dich bewaar tot later!’

 

‘Nae’ wonks* du mit 'ne malse lach

 

En bleefs mich in miin ougen kiiken...

 

Ich wist neet meer waat 'ch deei of zag...

 

Ich veulde 't blood nao baoven wiiken...

 

Diin oug waas ouch zoo deep, zoo klaor,

 

Nae waor, Marie, nae waor?...

 

 

 

Marie, wo is dae schoonen tiid,

 

Wo is dae bloomenkrans gebleven?...

 

Och, hoeveul zaken zin veer kwiit,

 

Die, mit dae wonjerschoonen tiid

 

Veur eeuwig zin eweggedreven!...

 

Waal schiint de zon, mer zoo 'ne glans

 

Es toen haet zi veur os verlaoren...

 

Waal bleuijen bloomen in 'et kaoren,

 

Mer deenen os neet meer tot krans!...

 

En waas de krans allein nog mer verlaoren!...

 

Mer-wo is zelfs diin donkel haor?

 

Nae waor, Marie, nae waor?

 

 

 

Emile Seipgens