Mosalect. Bloemlezing uit de Limburgse dialectliteratuur

[p. 45]

Allèng zieë
Gulpens

Och lot mich toch allèng zieë,
ongesjtuurd,
zoedat mieng gedachte kinne
goeaë, noa lang vervloaëge tied,
wie ich nog kink woar
en gelukkig
in mie straeve en verlange
noa al dat sjuns,
dat mich nog wachde,
later
es ich aemoal groeët
en man zou zieë.

Al dat sjuns noe
verdwaeëne,
sjtuk geraeëte
en a flarde
durch de sjturme van
't laeëve
en de jach durch
dizze tied.

Och, lot mich toch alléng zieë
ongesjtuurd,
in gedachte wir gelukkig...
en ae kink,
wie ins in lang vervloaëge
tied.

A.H.F. Meertens