Hehheh
‘Hehheh,’ leet 't mins ziech op de baank zakke. ‘Hehheh!’
Iech zouw ouch ‘hehheh’ gezag höbbe es iech zoeväöl had mote mètsleipe wie zij, dach iech. Rauw gesjet mie es hoonderd kilo. Royaol, zoe op 't oug.
Ze haolde 'ne groete witte zakdook oet 'r kelbas en begós oetveureg häör geziech aof te vege. Ze had 'ne kop wie 'ne pieper en bekeek miech oonder 't pótse door vruntelek.
‘Da's de luie zweit,’ zag ze. ‘Dee brik miech altied oet es iech m'ch moot spooje. Iech had ze bekans gemis. Zaog ze koume gelökkeg. Meh 't is te werm veur hel te loupe.’
Iech perbeerde miech veur te stèlle wie dat zouw zien es die massa hel góng loupe, meh dat waor teväöl gevraog. Soms sjut zelfs de stoutste fantasie tekort. Intösse had iech nog gei woord gezag, meh iech had ouch neet oonvruntelek gekeke. Mier had ze sjijns neet nudeg veur te starte.
‘Mèt mie posteur,’ zag ze, ‘vèlt 't neet mèt este d'ch moos hajje. Iech moot nao m'n dochter. Ligk in 't kraombèd. E jungske. Veur häör 't ierste, meh veur miech 't derde. Kleinkeend daan, heh. Leuk menneke. En nögker! Kiek noe al roond en is zjus vief daog aajd! Meh dat waor zij ouch, m'n dochter. 'n Bijdehandte feeks. Höb geer ouch kinder?’
Ze bekeek miech en corrigeerde z'ch;
‘Kleinkinder?’
Wat wouw iech?
Kós iech doen of iech douf waor? Of stom? Of neet gans vaan Zjezeke?
‘Jao,’ zag iech. ‘Kleinkinder. Ach!’
‘Hölp, kindergaods! Ach? Nein, iech höb 'rs drei en es iech hún zoe huur zal 't wel debij blieve. Allewijl kin dat allemaol mer, heh? Wél kinneke? Okee. Hupsakee, zèt de weeg mer veerdeg. Gei kinneke? Ouch good! Daan neet! Dat waor in euzen tied wel anders, neet? Dee vaan miech zag altied: Lène, es iech nao d'ch loer, biste alweer zoe wied. Dat waor ouch zoe. Nou jeh, 't waor toch get mier es loere wat 'r doog!’
Ze beloerde miech zoe oondäögend wie 'n nette vrouw die aonsleting zeuk. Get verlege en aofwachtend wie iech zouw reagere.
‘Dat geluif iech,’ zag iech mer. Iech kós 're maan netuurlek neet. Dat snapde zij ouch.
‘Geer had dee ins mote kinne,’ zag ze. ‘Dee...’
Ze druimde effe weg en iech góng get oongemekelek op mien ander bats zitte. Godwèt wat miech bove de kop hóng. In de buurt zaot niemand mie, nao drei haltes geleie wie zij instapde.
Auteursrechtelijk beschermd