Leven van Sinte Lutgart

[20] Wiedwijs dat har lichame wart begrauen

DOen si verscheden was ende hare
heileghe lichame lach opte bare
so wart geureght daer menechuoyde
waer men den lichame legghen soyde
Ende et geuiel doen alst god gaf
dat daer comen was een crom staf
een abd, drie daghe the voren eer
si starf, ende beidde daer wanneer
si steruen soude, die selue abd seide
dat mense nygheren bad en leide
ende datd hem nygheren beter en dochte
dan in de kerke daer mense mochte
vfenen ende besueken van
al den lieden, daer ghewan
die abd gevolchhennesse van al den lieden
die dat alle gemeynlec rieden.
Doen groef mense ter rechter hant
van den chore aen de want
daer si haer ghebedeken plach

[fol. 98r]

 

the sprekenne beide nacht ende dach

 

op een solemne eersam stat

 

hars moet wi hebben alle te bat

765

dat si ons mote met haren gebede

 

aen onsen here vercrigen ghenede..

 

Men groefse wel dan op die stat

 

ende jnd cloester nygeren bat

 

want doen si noch leefde de maget vri

770

ende har de nonnen vreghden wat si

 

souden aengaen alsi waer doed

 

want si soudse in groter noed

 

laten, so andwerdde sinte lutgard

 

ende sprac toet hen dees troestelec waert.

775

Comt alle dan the minen graue

 

ic en sal v nyet gaen aue

 

daer sal ic v in staden staen

 

als ic leuende heb gedaen..

 

Dat was een edel trostlec gelouen

780

dat gelouen dat ginc bouen

 

goud ende seluer godeweet

 

ghi ionfrouwen van mielen claeght v leet

 

ende v vernoy der edelre maeght

 

si saelt v betren op dat gijt har claght