Leven van Sinte Lutgart

[16] Wie datte viande dicwile har oppenbarden ende wie sere dat sise ontsagen ende vreesden.

Dicke quamen toet haer de viande
om te done onvrede ende scande
ende brachten haer quaed boedscap tehanden
dat sise veriaeghde te haren scanden
metten tekene dies crusen daer si
haer met bewarde de maget vri
ende spau op hen ende deed hen onere.
De viande ontsagens oec so sere
dat si scuden de stat voer waer
rechs als gloyend yser, daer
si haer gebed te sprekenne plach jnne.
ende nochtan datte gods vriendinne
der scrifturen nyet en verstont
ende haer de salme nyen waren cont
alsi den salm las di daer steet

[fol. 52r]

 

die deus in adiutorium aen geet

 

ende ander verse som die daer

 

jn den souter staen, voer waer

 

so sach si vlien de viande van uresen

845

ende lieten de maeght in rasten wesen

 

Ende nochtan dat sinte luthgaert

 

nyen verstont daer af een waert

 

si wist wel doch dat van der cracht

 

der waerde, de viand verloes sijn macht..

850

Brueder bernard vertelde dat hi

 

van haer heymelec hoerde dat si

 

en twint den viant nyet en dochte

 

ende dat hise nyet en mochte

 

verwinnen noch scheghen har staen

855

si hadden met crachte so ondergedaen.