Cupido's lusthof

(1613)–Gerrit Hendricksz. van Breughel– rechtenstatus



[pagina 18]
4. Emblemata.
HY diet schier achten eenen droom Te sitten onder eenen boom VVaerom sich Bacchus had ghevlecht Bemercten alles eerst te recht Doen hy gheslapen had met lust, Vant hem in zijns Liefs schoot gherust Den Nectar daer verdreeff de quael Van tvveeghelieffkens teenenmael Den Minnaer vvenscht vvel na de doot Doch tsterven in zijns Liefstens schoot Maer meerder vreucht het oyt hem brocht Dat hy lang by haer leven mocht.

Cupidoos Heemel is te eruen met liefd in liefs schoot te steruen.
[pagina 19]

Een nieu Amoureus Liedeken: Op de voyse. Daerder twee een vrijster vrijen, &c. IN het rusten door soet dromen Legghende te slapen fier Was bynae ick opghenomen Deur Morpheus zijn bestier Vreuchdes droom my maeckten ang Soeten slaep duert eens soo langh. Iupiter had doen gheboden Een Feest te bereyden daer Noodende al d'ander goden Deur Mercurius voorwaer Twas soo chierlijck int aenvang Soeten slaep duert eens soo lang. Mars quam eerst met cloeck bestiere Hymeneus vol van vreucht En Vulcanus vanden Viere Bacchus heeft hun soo verheucht Cupido ginck Lieffdes gangh Soeten slaep duert eens soo langh. In der Goden gulden zale Dese feest was toeghericht Pluto rijck als principale Phoebus heeft de zael belicht Met zijn gouden stralen strang Soeten slaep duert eens soo langh. Triton heeft t'lavoor ghenomen Nepthun maeckte d'handen reyn AEolus is inghecomen Heel vercoelende het pleyn Aura quam onder tghedrang Soeten slaep duert eens soo langh. Al des Hemels schoon Goddinnen Quamen van hun throon playsant Die schoon Venus vander Minnen Met Minerva vol verstant Iuno Rijcklijck int ontfangh Soeten slaep duert eens soo langh. Ceres bracht daer alle vruchten Groeyende op Tellus weydt Ia Pomona vol ghenuchten En Diaen in reynicheyt Flora bracht het schoon behang Soeten slaep duert eens soo lang.
[pagina 20]
Meya om het soet vermaken Met haer Muses drymael dry Amphion voor alle saken Speelden s'hemels melody Vreucht bedreeff t'ghepeysen bang Soeten slaep duert eens soo lang. Prince. Die reyn Prinslijcke Najaden Met de Nimphes vol van eer Iae oock allen de Dryaden Dienden dees feest met begheer Helder claer Syrenen sangh Soeten slaep duert eens soo langh. Finis.
Cruys-vers. Menich mensche schept een lust Wanneer dat hy leyt te slapen Denckt dat hy by zijn lieff rust Droomende hy vreucht gaet rapen.
Een nieu Amoureus Liedt: Op de voyse. Lieff uytvercoren,, Lieff triumphant. REynder Goddinnen // En vintmen niet Ter werelt binnen Als mijn Lieff siet / Eerbaer certeyne / Als Iuno Rijck / In kuyscheyt reyne Diaen ghelijck Ick wensch dickmael In swerelts zael By mijn Loyael Te leven autentijck. Door veel ghedachten Op haer persoon Can ick niet achten Vrou Venus schoon Soo ick mocht werven Dees reyn Najaed'
[pagina 21]
T'leven en sterven Stondt in een graed' Maer eer int ent Fortuna went Sal zijn bekent Tot mywaerts heur ghenaed'. Peerle der bloemen V moet ick meer Als Daphne roemen In kuyscheyt teer Want t'allen daghen Zijt weert ghy hier Een Croon te draghen Van Lauvverier Als Pallas wijs Nae t'recht advijs Der Nimphes prijs Ghewindt ghy goedertier. Lachesis rustich Lenght slevens draet Mijns Liefsten lustich Op dat langh staet Haer jeucht en groeyet Nae mijnen lust En vreuchdich bloeyet Waer inne rust Mijn soet ghedacht Dach en oock nacht Door Venus macht Die qualijck werdt gheblust. Atropos woedich V wat vermijdt Dat ghy niet spoedich Soo haest affsnijdt Het eyndt vant leven Beghint sulcks niet Voor dat het even Iupijn ghebiedt Gheen Lieffd' verdooft Oft Min berooft Van die belooft Malcander hebben siet. Waer ick my keere O Reyn Carssou Dies noch te meere Groeyt Lieffde trou Als ick mach speuren V claer Aenschijn Mindert mijn treuren En lijdens pijn
[pagina 22]
Coralich root Mondeken bloot Al ist nu noot Twert wel eens Medecijn. Mijn herte open Spreeckt zijnen grondt En stelt het hopen Tot deser stont Met groot verlanghen In Lieffd' Ydoon Dat ghy ontfanghen Sult mijn persoon In u ghenae Eert valt te spae En segghen jae Met troostelijcken loon. Die eens cond' weten Lieff wat ghy denckt En s'herts secreten Waer me ghy crenckt My die voltrouwen Nae eere staet En wil opbouwen V Maechtlijck zaet Liefste beleeft Doch minlijck gheeft Diet noodich heeft Tsal wesen t'uwer baet. Prince. Princes van waerden Eel soete jeucht Op deser aerden Ghy niet en meucht Meer jonsten toonen Als u dienaer Diet weer can loonen Dan hy voorwaer En dencken tgoet Dat ghy my doet Met honich soet Laeff ick u weer eenpaer. Finis.
Nieu Amoureus Liedeken: Op de voyse. Go frò me windou my Lieff, &c. ALs ick om rusten sacht // bedacht Gheleghen was te nacht // in cracht
[pagina 23]
Doen peynsden ick ydoone Hoe dat de wijsheyt schoone Tot my quam selver gaen // seer saen. Laet u sinnen niet slecht // ghelecht Zijn tot een maecht in echt // oprecht Die ick u wel sal wijsen En weerdich is om prijsen Siet dat ghy dese maecht // behaecht. Ick sprack wijsheyts Goddin// de min Brengt oock veel droefheyts in // den sin Wist sy tot desen tijen Dat ickse dacht te vrijen So waer mijn Lieffde siet // verdriet. Pallas sprack / opter daet // met raet Sal ick u zijn te baet // hoet gaet Oock al die eerlick minnen Vyt reynder hert en sinnen Wie vrijt in eer en deucht // wint vreucht. Overschoone greyn // seer reyn Thert denckt om u certeyn // alleyn Soo wel int van u scheyden Als tsamen gaen vermeyden Die Lieffd' tot t'liefste kint // vast vint Prince. Prinslijcke Maget teer // vol eer Thert daechlijcx met begeer / streckt meer Na u wt Lieffde trouwe Als tot eenich Ionckvrouwe En wacht na tsoet propoost // van troost. Finis.
Nieu Amoureus Liedeken: Op de voyse. Wie clopt hier aen mijn deurtgen, &c. CVpido hooch in crachten Den Goden ghy begheert Hoe groot sy zijn van machten V schichten ghy soo keert Dat yeder minnen leert. Iupijn cost niet bedwingen Zijn groote Lieffde snoo Maer deed' hem onderlinghen Verlieven op Io En oock op Calisto. Boreas als den stranghen
[pagina 24]
Onstuymich altemet Subtijl hebdy ghevanghen Met voorberaets opset In u Lieff minnent net. V hulpe gaet ghy jonnen Door Lieffdes Fackels gloet Woud' hem den Vader gonnen De overwaertste vroet Zijn Orithia soet. Dan soud' Boreas asen Wt sliefs fonteyne claer Soet windichlijck wel blasen Een wint die voor of naer Hem vorderlijcken waer. Waer voor dit langhe smeecken Heeft Boreas gheen macht Tis tijt sulcx wert ghebleken D'wint op zijns veders cracht Sulcx wel ten rechten bracht. Ginck Boreas niet baden In dees zijns herts Rivier Orithia met smaden Soud segghen preus en fier Boreas wijckt van hier. De stercke Lieffd' can stueren Door een gheleden smert Datmen wel con vervueren Die d'minnaer eerst viel hert Dat sy verwonnen wert. Oft Orithia claechde Dat ick haer volchde nae En dattet heur mishaechde In eens te segghen jae Twert wel haer eyghen schae. Lieffd' heeftse niet bedroghen Maer Boreas onstil Is met haer opghevloghen Dus doet nu sonder schil Orithia zijn wil Finis.

Vorige Volgende

Cupido's lusthof

4. Emblemata.

Een nieu Amoureus Liedeken:

Cruys-vers.

Een nieu Amoureus Liedt:

Nieu Amoureus Liedeken:

Nieu Amoureus Liedeken:

Over dit hoofdstuk/artikel

lied