Het Liedeken gaet op die wijse: Lief wat heb ick u misdaen, dat ghy my dus hebt begeven.
MYn liefkens liefde is vercout,
Dat word ick noch gheware,
Sot is hy die hem betrout
Op Ionghers ick bevint clare.
Eertijts stont ick int herte vercoren,
Ick was sijn eyghen al gheheel ghesworen,
Al wat ick dede was na sijn herte,
Ick cost verdrijven alle sijnen thoren,
Noyt schoonder en wasser in sijnen sin gheboren,
Van my een ure te zijn dat was hem smerte,
Ick was die ghene na welcke hy perte,
Tscheen hy beminde my boven maten,
Maer het fenijn lach verborghen inden sterte,
Want nv int eynde heeft hy my verlaten,
Waer sal ick hem soecken in weghen oft straten,
Die alle mijn vreucht dus heeft versleten,
Ick gheloofden eertijts sijn minnelich praten,
Maer nv eylacy heeft hy my vergheten.
Hoe mocht hy also valsch zijn,
Ick ben daer af seer verwondert,
Alsulcken gheveynsden schijn,
Mocht niet wesen onder hondert.
Eylaes hoe is hy nv van my verveert,
Mijn by-wesen heeft hy dickwils begheert,
| |
Maer nv so my dunckt ist met hem ghedaen,
Eertijts was ick hem lief en weert,
Maer nv hy vyantschap vercleert,
So en siet hy my niet meer eens aen,
Ick ben nv seer magher en bleeck saen,
Waer van oorsaeck is sijnen valschen gront,
Met die banden der droefheyt lig ick ghevaen,
Hoe soude connen gheblosen den mont,
Eertijts stonden mijn borstkens appel-ront,
Van mijn schoonheyt plach hy te vermeten,
Doen waren wy te samen in een verbont,
Maer nv eylacy heeft hy my vergheten.
Hy en is niet wel ghesint,
Die hier Ionghers wilt aenhooren,
Noyt en had ick hem bemint,
Had ick hem ghekint te voren.
Prince ic en weet niet waerom hy my mach begeven
Niemant dan hy en staet int herte gheschreven,
Niemant begheere ick dan sijnen persoone,
Och nv so heb ick seer wel beseven,
Hoe scheyden van lieve eenen doet sneven,
Ick claecht u Venus o vrou ydoone,
Het is onverdient alsulcken loone,
Coemt wilt uwe dienersse versolateren,
Want ghy elcken te troosten zijt ghewoone,
Ick begheere, wilt my conforteren,
Troost van lieve sou ick wel begheeren,
Hem zijn wel bekent alle mijn secreten,
Eertijts plach ick hem te recreeren,
Maer nv eylaes heeft hy my vergheten.
Princessen hoort altemael,
Wilt u altijt wel bedencken,
Eer ghy drinckt wt Venus schael,
Want fenijn sal sy u schencken.
|
|
Auteursrechtvrij