Mestreechter leedsjes-cahier. Nommer 2

[p. 37]

Standbeelde.

Veer kriege noe 'ns get gezawwel
euver standbeelde vaan Mestreech.
't Is geine sjele wawwel
geer zeet ze euveral langs de weeg.
Laank en klein, ouch dikke, dunne,
groet en fors, meh ouch dèks plat
de zuus soms neet vaan wat veur kunne } bis
die sjoen, proonkstökke vaan eus stad. } bis

[p. 38]

 

Op de Boschstraot steit terdege

 

e beeld vaan euze Pie Regout.

 

Gaas liet Minckeleers dao vlege

 

tösse vès en rommedou.

 

Achter häöm steit in 't water

 

e sjoen beeld vaan Sint Antwan.

 

Heer hèlt Minckeleers mer in de gater } bis

 

met die vesgeert in z'n han. } bis

 

 

 

Op 't kloester zit 'nen diechter

 

dee proonk dao mèt zien bloete bein.

 

Sint Amor veult ziech väöl gewiechter

 

hiel hoeg dao op 't Amorsplein.

 

't Mooswief steit met häör sevoeje

 

en loert dao mer nao 't stadhoes

 

Op 't Keuningsplein nog lui in boeje } bis

 

mèt köp zoe plat al wie 'n loes. } bis

 

 

 

Karel de Groete steit sins ieuwe

 

in de kerrek mèt z'n kroen.

 

Oppe Vriethof mèt drei lieuwe

 

besjiete de doeve de perreon.

 

De gemeinteraod wis wel vaan wante,

 

'n ezelke sjietgeld moos debij.

 

Op 't pleinsje bij de Bonnefante } bis

 

't sjit gei geld of zwijnerij } bis

 

 

 

Op 'ne pileer hiel hoeg verheve

 

in de Percée, dao steit Selvrouw.

 

En veer bisjoppe deneve,

 

mèt hunne rögk al nao häör touw.

 

De stadsingel stoont verlaote

 

in de moer al langs de Maos,

 

meh kin noe gezèlleg praote } bis

 

met 'ne groete Sintervaos. } bis

[p. 39]

 

In 't parrek dao steit vaan Oppe,

 

jaomer genóg allein de kop.

 

't gong neet gans, ze móste stoppe

 

want de duite waore op.

 

d 'Artagnan tegeneuver de bere,

 

dee hèlt dao hiel trouw de wach,

 

in de buurt höbbe Mestreechtenere } bis

 

de Stoomp en Dibbets neergelag. } bis

 

 

 

Aon de Stokstraot op 'ne sókkel

 

steit jao de Mestreechter Geis,

 

heer heet e snuutske wie 'n kókkel

 

't zien mer kneuk en haos gei vleis.

 

D'n echte geis, 't kaan neet misse,

 

de geis vaan de Mestreechter klaank.

 

Jao, dat is Fons Olterdisse } bis

 

mèt de kinder op die baank. } bis

Theo Loontjens