Het prieelken der gheestelyker wellusten

[p. 96]

Een schoon liedeken van pacientie,
opden thoon, La Benoiste Trinite.

Pacientie is soo goeden cruyt,
Sij is nu int saisoene,
Want haer cracht en haer virtuyt
Heeft yegelyck nu van doene.
Wilt u te plucken spoene
Dat edel cruydeken goet.
Sluytet binnen int herte dijn,
En dinckt het sal eens beter zyn,
Sterct in Godt uwen moet.

Alle die pacientie behoeft,
Aldus sult ghyse saeyen,
Troost de ghene die zyn bedroeft,
Soo sal u Godt oock paeyen,
En helpen u utten quaeyen,
Als ghij in lyden zyt,
Want zoo ghij uwen naesten doet,
Dat suldi vinden tzy quaet oft goet
Voor Godt gebenedyt.

Wildi pacientie crijgen saen,
Hoort toe ick salt u leeren,
Ghij sult die daegelijcx plucken gaen
Int bitter lijden ons Heeren,
Wilt u herteken daertoe keeren,
Met traenen wilt aensien,
Wat Jesus voor u gheleden heeft,
Hij is die de pacientie gheeft
De ghene die tot hem vlien.

[p. 97]

 

Al die ompatientich zyn

 

In dese droeve tyden,

 

Sy doen hen selven dobbel pijn,

 

Want iegelijck moet nu lijden,

 

Ten baet murmureren noch strijden,

 

Hout u in Godt gherust,

 

Liet elck zyn sondich leven staen,

 

Den tyt die soude beteren saen,

 

Den honger soude worden gheblust.

 

 

 

Die dit Liedeken heeft ghedicht,

 

Veel lijdens heeft zy verdraegen,

 

Groot en cleyn van alle ghewicht

 

Tot in haer oude daegen,

 

Zy en willes niemant claegen,

 

Dan Godt diet beteren mach:

 

Die beste remedie die zy vint,

 

Es te peysen ick hebt verdient,

 

En dienen Godt nacht en dach.