Het prieelken der gheestelyker wellusten

[p. 87]

Een geestelijck liedeken
opden toon: Noseroit on dire, &c.

De Heere.

Och oft u herteken brande
In een levende offerande
Tot my altyt bereyt:
Ghij sout naer my haecken,
Ende dicwils smaeken
Myn groote soeticheyt.

De Mensche.

Ick wormken vander aerden
soude gaerne deucht aenveirden,
Maer Heer ick ben soo cranck:
Al maeck ick goede opsetten,
Mijn lichaem wiltse beletten
Tegen mynen danck.

De Heere.

Ick laet u wel tempteren,
Ende persequeren,
Want ghij moet zyn gheproeft:
Wat cant u gheschayen,
Dat die winden van buyten wayen,
En weest daerom niet bedroeft.

De Mensche.

Heer wilt mynen gheest onsteken,
Dat ick zien myn ghebreken,
En die verwinnen mach.
Wilt met u licht doorsoeken
Mynder zielen hoecken,
Bid ick u nacht ende dach.

De Heere.

Wilt vast op my betrouwen,
Ten sal u niet berouwen,
En zyt niet als een riet.
Laet de werelt vaeren,
Sy doet den gheest beswaeren,
Sonder Godt es alle dinck niet.

F I N I S