Geestelick vreugde-beeckje. Toe-ge-eygent aen de Hollantse jeughd
(1645)–Johan van Born–
AuteursrechtvrijOp de voyse alst begint.WAnneer ick slaep voel ick mijns levens vreught,
Als my den droom door mijns LIefsschijn verheught,
Als sy my aen haer mondt een kusjen jont,
Waer mee sy my stelt, door haer soet ghewelt,
Waer mee sy my stelt gevangen,
| |
[pagina 53]
| |
O slaep, o soete slaep, duert lange.
Als ick ontwaeck soeck ick verlooren goet,
't Welck my ontgaet, en volght den slaep met spoet,
En laet my alleen naer, 't dencken aen haer,
Die mijn vry gemoet, door haer ooghskens soet,
Die mijn vry gemoet hout neder,
O slaep, o soete slaep, komt weder.
In mijn gemoet sien ick haer nacht en dagh,
Ick maeck my wijs, 't geen niet wesen en mach,
Nochtans dees dwalingh soet, mijn leven voedt:
Want sy tegen sin, van dien ick bemin,
Want sy tegen sin my haer naeckt,
O slaep, o soete slaep, dit waer maeckt,
Och of dees slaep, die my aenbrocht dees vreught,
Daer ick naer gaep, weder quam met geneught,
't Waer my vermaking goet, in tegenspoet,
Dies mijn eensaemheyt, Lief niet langher beyt,
Die mijn eensaemheyt wilt staecken,
O slaep o soete slaep, wilt naecken.
In mijn droom, opend ick haer mijn hert:
Och of den schroom en vrees in al mijn smert,
Door haer antwoorde klaer, een eynde waer,
Ick soud metter spoet, vreught hanteren soet,
Ick soud metter spoet druck laten.
O slaep o soete slaep, ter baten.
In mijn gemoet is sy altijts present
Di emy dus doet leven in swaer torment
Och of ick haer dienaer mocht zijn hier naer,
Trouw soud ick haer zijn gestadigh,
| |
[pagina 54]
| |
O slaep, o soete slaep, furadigh.
Princesse reyn, mijn hert en mijn gemoedt
Houdt ghy alleyn, dies ick met groot ootmoet
U bid om troost seer reyn, o edel greyn
Want ghy my alleen, in dit groot geween,
Want ghy my alleen doet haken,
O slaep, o soete slaep, komt vaecken.
J.V. Medecijn. |
|