Brusselschen Blom-hof van Cupido
(1641)–Willem van der Borcht–
Auteursrechtvrij
[pagina 121]
| |
Stemme: Doen sprack dat proper maeghdeken.
LAet ons den vasten-avont-tijt
Verslijten met veel jolijt,
Laet ons ons voeghen tot het drincken,
Bacchus sal ons het wijntjen schincken,
Eer ons den tijdt ontglijdt.
2. 't Is best dat wy den jonghen dagh
Besteden in drolligh' ghelagh,
Eer dat aen ons ons' grijse hayren
Niet dan een koude droefheyt baren:
Dus kies ick desen dagh.
3. Dus kies ick desen dagh van vreughdt,
En wil ghebruycken mijn jeughdt,
Eer dat ons ons' naer-komelingen,
Over ons' droeve doodt-kist singen,
Tot hun-li'en meer gheneught.
4. Want wat ons naeste maeghschap doet
En heeft ons noyt ghevoedt
Vrinden plaisier en groote genuchten
Doen den gulsigen Bromium suchten,
Soo hy niet med' en doet.
| |
[pagina 122]
| |
5. En wat ick aen mijn selven doen
Dat plagh my meer te vo'en;
Liefde die wilt haer selven eerst minnen,
En dan laet sy haer zwacke sinnen
Tot anders baten ho'en.
6. Ey ! laet ons dan den lieven dagh
(Die ons ghebeuren magh)
Niet ydel van ons laten af-loopen,
Ons gelt dat dient om vreughden te koopen
Met malheydt en ghelach.
|
|