Geschiedenis van Leuven. Geschreven in de jaren 1593 en 1594

Philippus, Den sevenenveertichsten Hertoghe van Brabant.

Den sevenenveertichsten hertoghe van Brabant es geweest Philips van Sint Pol, hertoghe Jans voers. broeder, ende sone hertoghe Anthonis wijlen van Bourgoindien. Ende wert te Loven, als hertoghe van Brabant, ontfangen ende gehult, xxiiij meij anno 1427, confirmeerende allen der stadt van Loven ende des landts privilegien³. Ende de stadt beschanck hem met iij silvere vergulde potten wegende xxij ½ marck, die costen, boven vj ½ marck silvers ende vij goude nobelen, die de stadt daertoe dede, v^mv^clxviij plecken, vj stuijvers paijements; ende noch iiij swertte laekenen costende iiij^m j^c ende lxxxvj plecken.

Anno voers. viij augustij, sandt de stadt Loven, te Bruessele, aenden hertoghe van Brabant hem biddende dat hij scrijven wilde aenden bisschop ende de vij archidiakenen van Luijck, ten eijnde dat zij dUniversiteijt van Loven wilden laeten gebruijcken alsulcke privilegien als zij hebben vanden Paus van Roomen, als dat de scholieren, die te Loven woonende zijn, haere vruchten van hunne prebenden vrijelijck, binnen de voers. stadt Loven, souden moghen gebruijcken, gelijck in andere steden.

Anno 1427 voers. prima octobris, track M^r Hendrick de Mera, van stadts weghen van Loven naer Roomen, om aldaer vanden heijlighen vaeder den Paus te vercrijghene de faculteijt inder Godtheijt, binnen de Universiteijt, te Loven; maer niet verworven.

Anno 1428, in octobri, verleende hertoghe Philips voers., tot behoeff vande Universiteijt, te Loven, zekere privilegien van xv canonicxprebenden, tot behoeff vande doctoiren inde rechten, medecinnen ende arten.

In octobri, anni voers. wordden dEngelsche laeckenen vuijten lande van Brabant gebannen.

Anno 1429 worden er een houwelijck getracteert tusschen den voers. hertoghe Philips van Sint Pol ende vrouwe Toulete⁴, des conincx Lodewijcx van Cecilien dochtere, wijens ambassaet te Loven innequam ij junij 1429, omde duwarie der voers. dochtere te hebben vanden voers. hertoghe van Brabant, ende de stadt van Loven schanck hem eenen overdeckten silveren vergulden croes, wegende ij marck, vij oneen, xiij engelschen. Ende den hertoghe van Brabant wert geconsenteert eene bede van x^m croonen, in decembri 29, omde voers. vrouwe Toulete, zijne toecomende bruijt, te haelen.

Anno 1430, iiij augustij, es de voers. hertoghe Philips, te Loven, opde Borch, gestorven; ende naer zijn doot zijn de staeten vanden lande van Brabant te Loven vergaedert geweest, ende ordonneerden datmen zijn doode lichaem soude laeten staen in baeren, gebalsemt, totter tijt toe dat dlandt van eenen anderen hertoghe waere versien; ende dat soo lange alle officieren haere

3 In 't groot Charterbroeck, folio 58.

4 Yolenda, dochter van Lodewijk II^e, hertog van Anjou, graaf van Provence en koning van Sicilien.

[p. 51]

officien, opden naem desselffs hertoochs, souden bedienen; ende de Cancelier met zijnen seghel seghelen; ende datmen gelt op zijnen naeme soude munten. Ende zijn vuijtvaert wordden te Vueren gedaen, ende wert aldaer begraeven, viij octobris 1430, daer van Loven bij waeren: Jacop Uten Lieminghen, borgemeester; Baudewijn van Graven, heer Sijmon Pinnock, riddere; Joos Absoloons, Claes de Keerssmaeckere, Goort Roeloffs, heer Jan vande Bruggen, riddere, ende Jan van Nethenen.