Gemmarum et lapidum historia

Differentiae ossifragi, loci natales & facultates admirandae. Cap. CCXXXIIII.

TRes huius lapidis obseruatae sunt differentiae. Prima litera B notata continetur is qui ossi vsto similis paruisque foraminibus in superficie plenus est, ac intus ossium spongiosam compagem habere videtur, non secus ac si os in

[p. 205]

lapidem versum esset, quod fortassis verum est. Hic attritus vel vstus lotii veteris aut ossis vsti instar olet, nec eas facultates habere creditur quas sequens species. Secunda differentia notata litera A is continetur, qui truncorum forma cum rudimentis ramorum, videtur arboris truncus in lapidem ossi similem & concauum commutatus, hic proprie Stelechitis nomen meretur à forma. ⁺Nascitur in Palatinatu locis arenosis non procul à Spira. Item prope Heidelbergam ac Ienam Saxoniae, item in Silesia in fonte limpidissimo pagi Schonwalda & circa Darmstadium in der Berg stras, vt Germani locum illum appellant. De hoc lapide Thomas Erastus Heidelbergensis professor & quondam praeceptor meus commentarium edidit doctissimum, eum lapidem sabulosum nuncupat.⁺ Crescit per arenam forma coralli, interdum brachii crassitie, ac dum primum erumpit è terra friabilis est, tandemque paulatim magis indurescit. Huic lapidi similem mihi dono dedit Generosus & nobilis Vir Christophorus Vdalricus à Burchsdorp. Sacr. Caesar. Majestatis Rudolphi II. Imp. & Domini mei clementissimi dapifer, quem in patria sua Marchionatu Brandeburgensi plantae instar excrescere mirabili modo aiebat ac à consolidandis ossibus bainbruch vocari. Primum aiebat initio veris pullulare è terra quasi exiguam brassicam capitatam foliis cinereis & subnigris, deinde expansis quasi foliolis ad terram (nam vix caput hoc è terra prorumpit) reperiri in meditullio medullam seu puluerem quendam facile in liquorem solubilem. Tum effodi plantam eiusque ramos reperiri osseos puluere isto ad ossa paucis diebus glutinanda foecundos. Inueniuntur etiam odorati ossifragi in ditione Comitis à Solms non procul à Iena in monte Arenoso, femoris quandoque figura & magnitudine. Tertia porro differentia notata litera C substantia à prioribus differt, nam neque arenosus lapis neque terreus aut friabilis est, sed tenax ossique similis & solidus odorem ac saporem cornu monocerotis vulgo dicti, gustu subastringente referens. Hanc speciem ossifragi quis Enosteum vocare optimè posset, sed alium eo nomine describam.

+ Locus vbi nascatur.

+ Lapis sabulosus.