Gemmarum et lapidum historia

De Hematite spurio triplici. Cap. CCIX.

NAscitur in Silesia non procul ab arce Lehnenci ad Boberum flumen lapis similis Haematiti ab incolis Bluetstain, Braunstain aut Braunfarbe vocatus. Is durus non est eoque figuli tingunt fictilia Hirsbergi. ⁺Vstus crocum martis colore & effectu refert, nam ad sanguinis eruptiones compescendas vtilissimus est. Alterum genus reperitur in ferri metallis globosum, colore partim rubricae partim ferri nigricantis, friabilis ob inaequalitatem, dutus tamen. Hoc à Dioscorde describi videtur. Nam caeteri solidiores adulterari nequeunt, neque colore sanguineo, sed ferri perpoliti spectantur. In hoc genere quidem colore saturiore reperiuntur, croceum puluisculum fundentes, quales Plinio in Aethiopia nascuntur. Tertium genus ferrugineum & graue est rubrica obductum & supra rubricam creta pallida. Deinde tectum crusta simili aetiti, tenuiore tamen & fragiliore, quae septi modo peruadit ad intima. Lapis hic ad cotem croceum & sanguineum succum profert. Reperitur Aretii vbi fons est acidulae congener ostraciti. Vim habet astringentem & aliquantulum excalfactoriam & extenuantem, vt Dioscorides tradit, ideo exterit oculorum cicatrices & scabritias cum melle. facit etiam ad lippitudines, oculos contusos ac cruore suffusos cum lacte muliebri. Bibitur ad difficultatem vrinae, fluxusque muliebres, ac iis prodest qui sanguinem reiecerunt.

+ Ad sanguinis fluxus.