Gemmarum et lapidum historia

De lapide fellis. Cap. CXCV.

IN cisti fellis animalium lapis inuenitur ochrae colore seu obsurè flauo, qui ex crassiore & terrestri bilis portione, prorsus eodem modo quo lapis Bezoar, crustis se inuicem complectentibus coalescit. ⁺Valet ad venena, praesertim ille qui exboum cisti exemptus est, vt mihi amicus qui se multoties id expertum dicebat, sanctè affirmauit. Existimarem ad aluum deturbandam aptiorem, quod bilis ex qua coaluit huic scopo à natura destinata sit. Ad venena eum qui ex ceruis, capris aut aliis animalibus quae in montibus salutiferis herbis pascuntur, eruitur, aliis praeferrem. Lapis in cisti fellis boum Alcheron à nonnullis vocatur, qui contusus, ac naribus inditus visum acuit, ac fluxus ne in oculos fluant prohibet. Lentis magnitudine cum succo betae naribus inditus epilepticos paroxysmos prohibere in posterum traditur.

+ Ad venena.