Gemmarum et lapidum historia

Natura, facultates & vires Gagatis. Cap. CLXV.

ATtritu calefactus succini instar paleas trahit, fictilia ex eo inscripta, Plinio teste, non delentur. Oleo facilius extinguitur quam aqua. Oleum enim commiscetur ei ac ignitum corpus suffocat, aqua cum pinguedini misceri non possit, ignito cedit corpori nisi omnino id totum tegat & obruat. Verum id non facile fieri potest. Quia lapis leuis est & suprema aquae, vt oleum omne petit. Calidae est facultatis. Suffitu serpentes fugat, dęmoniacos prodit ac daemonibus aduersari creditur. Epileptici aut morbo comitiali laborantes, si suffitum ipsius olfecerint, extemplo morbo corripiuntur. Obid num liberati sint necne hac nota facile percipitur. ⁺Contra nocturna terriculamenta, Ephialten, Daemonumque vexationes ac praestigia gestatus plurimum conducit: suffitus menstrua prouocat. ⁺Partum puluis potatus plurimum inuat & accelerat. Suffitus naribus exceptus vtero suffocantes restituit. ⁺Diureticae est facultatis ob id confert hydropicis pellendo humorem per vrinam suaque qualitate ac corroborandi vi, quia haepatis & ventriculi vitia corrigit, humores superfluos consumendo ac in halitum digerendo. ⁺Virginitatem prodit non solum suffitu, sed potatu. Nam si puluerem bibat virgo, non vrinabit, si corrupta sit, vrinam retinere non poterit, multorum testimonio. Ex vino decoctus puluis dentibus medetur Ex gagate lapide oleum distillatur petroleo viribus pene simile, calidius tamen.⁺ Prodest ad epilepticos, daemoniacos, paralysin, conuulsionem, tetanum. Eius vsus praecipue ad frigidam podagram omnesque frigidas fluxiones, commendatur inuncta parte. ⁺Item ad conceptum & imprimis ad vteri praefocationem quam breui compescit. Accensus ac vino extinctus syncope correptos restituit. ⁺Puluis drag. vnius pondere ex vino haustus septem diebus colicam integrè sanat.

+ Num epilepticus sit curatus.

+ Ad partum.

+ Diureticus gagates.

+ Virginitatis exploratio.

+ Olei gagatis vires.

+ Ad suffocationem vteri.

+ Ad colicam.