De emplastro fortiori cui miscetur puluis lapidis lasuli, vt illustrior portio à minus illustri separari possit. Cap. CXXVIII.
PRimum ad manus sint sequentia Terebinthinae clarae & purae vnciae quatuor: resinae pini vnciae sex, picis graecae vnciae sex: masticis optimae & purae vnciae tres, cerae nouae vnciae tres, olei seminis lini purificati vt paulo post docebitur, vncia vna semis. Postea adsit olla noua vitriata bene lota, cui impones ad lentum ignem carbonum terebinthinam vt dissoluatur, mouendo eam spatula lignea, qua Apothecarii vti solent. Cum bene dissoluta fuerit, paulatim iniice pini resinam in parua frustula secatam, ac moue. Eodem modo picem impone & postmodum mastichen puluerisatam, ac vt vniantur optime moue spatula diligenter materiam, sed exiguo foco opus est. Postmodum adde oleum lini, ac sine ad ignem donec murmurauerit ebullitio per horae quadrantem, aut paulo diutius; Vt autem scias emplastrum satis coctum esse, spatulam in emplastro agitatam exime, ac vt ab illa in aquam frigidam aliquot guttae decidant permitte. Nam si illae super aquam se expandant non satis est coctum. Aliter sic cognosces. Guttam emplastri digitis aqua frigida humectatis comprime, ac trahe in diuersas partes, si extendatur & sponte rumpatur, signum est perfecte coctum esse. Coctum emplastrum & calidissimum funde in manicam hypocratis, primo aqua calida humectatam ac coletur ita vt in vas aqua frigida plenum decidat. Manicam autem lignis comprimes, vt absque mora transcolari totum possit. Cum iam parum refrixerit, manibus malaxetur humectatis oleo lini praeparato, donec nihil amplius aquae habeat. Postea serua in aqua frigida quae quotidie aut alternis diebus effundenda est, recenti rursus affusa: ita enim seruabitur ad decennium.
Auteursrechtvrij