Gemmarum et lapidum historia

Dignitas, valor, vsus & fictio Achatis. Cap. XCVIII.

OLim in magna authoritate fuit Achates. nunc multum dignitatis propter copiam illi discessit, vt solent quae nobis familiaria sunt in contemptum venire. Nihil enim charum nisi rarum. Pocula adhuc hodie ex Achate fiunt, quae si ex eleganti ac semiperspicuo Achate elaborata sint, sat magno aestimantur precio nec viliores sunt Sardoniche. Vidi frustum duarum palmarum latitudine, cui Iulii Caesaris imago ac vxoris ipsius ita artificiose olim insculpta fue-

[p. 126]

rat, vt octo millibus thalerorum venditum fuerit. Sed antiquitas operis augebat precium. Vtuntur hodie Achate ad coronas precarias, quae etiam virginum colla & pectora exornant in Belgio. Ibi enim loco aurearum cathenarum in luxu sunt, propter miram quam habent variis coloribus elegantiam. Onychis precio aestimantur, si vero colores obscuri aut aliis vitiis maculentur, illis viliores sunt. Artifices hanc vitro imitari solent, cui diuersos immiscent colores. Sed facillime deprehenditur fraus, quod Achates limam respuat, ac illius superficiei, propter leuorem sordes non adhaereant.