Gemmarum et lapidum historia

Genera, loci natales & magnitudo Achatum. Cap. XCVI.

QVia infinitis coloribus variat Achates, hinc fit multa nomina apud veteros habuisse. Vocatur enim Phassachates, Sardachates, Haemachates, Cerachates, Leucachates, Dendrachates, Antachates, & Perileucos, Leonina quae leonis pelli similis est, ac Italis Brocatella vocatur. Nomina partim à colore,⁺ partim à forma quam referunt, partim ab aliis gemmis, quibus admixta est achates, dantur. Ab adnata illi Sarda, Sardachates, à colore albo leucachates, à forma arboris quam refert, dendrachates vocatur, & corallachates à coralli forma.
Omnium pulcherrimas Achates nobis India mittit. Primum in Sicilia iuxta flumen eiusdem nominis dicuntur inuentae. Nunc in Germania sub ditione Landtgrauii à Lichtenberg non procul ab oppido Schindthutten magna illarum copia inuenitur, quae ita interdum excellunt, vt cum orientalibus certare possint, & pro iis vendantur. Verum tales non ita passim sese offerunt. In agris reperiuntur. In Bohemia etiam non procul ab Argentina ciuitate Leucachates, punctulis nigris vel purpurei coloris inspersis, quae elegantissima est, reperitur. Achates tanta mole excrescit, vt pocula & scyphi inde fieri possint. Pisis duae crustae ouatae amplitudine ferme cubitali ad monumentum Cregorianum in campo Sancto dicuntur extare.

+ Brocatella