Gemmarum et lapidum historia

Facultates & vires Berilli. Cap. LXXI.

GEmmarii berillum gestatum contra hostium pericula, vitia hepatis, suspiria, eructationes valere, ac oris morbos, faciei, gulae & paristhmia prohibere, credunt. Illius ex aqua dilutum oculos humidos sanare perhibetur. Ad vulnera oculorum etiam aliqui celebrant, siue illa pupillae siue alteri parti inflicta fuerint. Reducitur Berillus contusus & tritus in pollinem exactissimè, vt impalpabilis sit. ⁺Deinde lentis quantitate puluis quotidie mane supino iacente aegro, in oculum donec sanetur, infunditur, ac praecipitur vt aeger im motus aliquam diu supinus permaneat. Si pupilla vulnerata fuerit etsi commode sanari non possit, tamen ita emendatur, vt oculus difformis non fiat. Si laesio extra pupillam fuerit, praeclarè sanat berillus, quemadmodum etiam omnes oculorum contusiones quacunque re factae fuerint. Suaderem ad contusiones & sugillata vt infusio fieret aqua verbasci: si adiuncta esset inflammatio aqua rosarum, plantaginis, eufrasiae vel simili. Si vulnus esset, aqua Bethonicae, Tormentillae vel plantaginis. Magi putant contra segnitiem hanc gemmam pollere, ingenio prodesse & coniugatos inuicem conciliare.

+ Ad oculorum vitia.