Den Gheestelycken leeuwercker vol godtvruchtighe liedekens ende leyssenen

(1645)–Guilielmus Bolognino– rechtenstatus



[pagina 390]
Derde deel. HIer is 't dat licht dan wordt ontset De bier-vliegh, die in 's vyandts net Vanght overlangh door overdaedt, En door oncuysheydt haer misgaet. Een meerder ruymte staet hen aen, Den breeden wegh die inne gaen, Verworpen wordt van hen te licht De langh versuymde sware Biecht. Licht loochent 't heylich Sacrament, Te nutten die 't is onghewent. Licht afgheschaft wordt hem de Miss' Te luy die haer te hooren is. Licht met haer Hooft hy laect de Kerck, Die daer van maect soo kleyne werck. Die niet en past op haer ghebodt, Licht houden sal met haer de spot. Dus siet ghenoech, die 't gade slaet, Hoe dat te niet allenskens gaet 't Gheloof, dat over langhen tijdt Door sonden is sijn leven quijt. De aerd', die heel doorwatert is, Haest padden baert, en d'acketis; In 't hert, doorweyct van bier oft wijn, Licht groeit het ketters quaet venijn. Een neus-wijs, op gheblasen gheest, Dit onderhevich is het meest, Die van de Const is, oft wat kan, Meer boecken leest als alle-man. Alsulck licht op sijn wijsheydt staet, En den Pilaer des vvaerheydts laet, Tot steunsel van een riet sich dient, En waeyt daerom met alle windt. Ontfermt doch, aldersoetsten Heer, De blinde mensch, die dwaelt soo zeer, En met u vrees sijn hert doorsteect, Tot 't recht gheloof dat soo verwect.