Den Gheestelycken leeuwercker vol godtvruchtighe liedekens ende leyssenen

Bedeylt indry deelen

Vanden Heilighen Apostel Andreas.

Siet de wijse fol. 48.

ANdrea, u heeft Godt

Tot een te grooten lot

Gheroepen in dit dal,

Alwaer ghy metter spoet,

Verlatend' uwen al

Ghevolght hebt 'teeuwich goedt.

Hoe seer hebdy ghetracht

Met allen u ghedacht

Het Evangelies licht

Allom, met pijn en moet,

Te brenghen in 't ghesicht,

Dat eewich leven doet.

Hoe wyt hebdy ghepreckt,

Van Godt daer toe verweckt,

Wat hebder al ghebrocht

Tot Christi soete wet,

[p. 199]

 

Die wonder wercken vroght

 

Allom door u ghebedt.

 

 

 

Hoe seer hebdy gheblaect

 

In liefde, en ghehaect

 

Nae 't Cruys, gheen hert soo seer

 

Nae 't water dorsten oot,

 

Als ghy, om Godt den Heer,

 

Ghehaect hebt nae u doodt

 

 

 

't Cruys heeft u soo behaeght,

 

Doen ghy 'tghereet nu saeght,

 

Soo seer 't u heeft verblijdt,

 

Dat ghy 't van verr' ghegroet

 

Hebt met een groot jolijt,

 

Als u voornemste goedt.

 

 

 

Ghy riept: Ah weest ghegroet,

 

O heylich Cruys, dat doet

 

't Hert springhen my van vreucht,

 

Langh dorst-ick seer nae u,

 

Maer nu ben ick verheught,

 

Dat ghy gheword my nu.

 

 

 

O Cruys, ontfanght doch my,

 

Ghy zijt my nu soo by,

 

Discipel vanden Heer,

 

Aen u die tot de doodt

 

Ghepynicht is soo seer,

 

Om onser zielen noodt.

 

 

 

Doen ghy aen 't Cruys nu honght

 

Godts lof-sangh ghy daer songht,

 

Twee daghen lanck verreckt

 

't Gheloof des Heeren daer

 

Gheduerich g' hebt ghepreckt,

 

Gheen lijden was u swaer.

 

 

 

Tot dat is uwen gheest

 

Ghevloghen nae de feest

 

Van 't onbevleckste Lam,

 

Dat u, hem nu ghelijck,

 

Met vreughden teghen quam,

 

Ontfong u in sijn rijck.

 

 

[p. 200]

 

Maer siet doch eens van daer,

 

Daer ghy nu Godt siet claer,

 

Siet op dit tranen dal,

 

Maeckt dat wy oock met u

 

Ghenieten onsen Al,

 

Die u versadicht nu.