Den Gheestelycken leeuwercker vol godtvruchtighe liedekens ende leyssenen

Bedeylt indry deelen

[p. 61]

[Treurich Syon eenich lot des Heeren]

Op de vvijse: Quam Mariam dulcibus ocellis.

Treurich Syon eenich lot des Heeren,
Gaet u droefheyt nu in vreught verkeeren,
Want u is een hemelsch kindt gheboren,
Dat onsluyten comt des hemels doren,
Wilt u al verblijden,
Maeckt te samen groot jolijt,
Gaet hem loven ./
Gaet hem loven,
Die ons brenght den gulden tijdt.

TReurich Syon, eenich lot des Heeren,

Gaet u droefheyt nu in vreught verkeeren,

Want u is een hemelsch kindt geboren,

Dat ontsluyten comt des hemels doren,

Wilt u all' verblijden, maect te samen groot jolijt

[p. 62]

 

Gaet hem loven, die ons brenght den ghulden tijdt.

 

 

 

Siet dit kindt om uwent wil hier dorsten,

 

Siet hem suyghen maeghdelijcke borsten,

 

Die den dorst ons comt der zielen laven,

 

Die hier comt om onsen vrijdom slaven,

 

Wilt u all' verblijden.

 

 

 

Siet hem naect en bloot op d' aerd' ghecomen,

 

Waer ons naectheydt wort door wegh ghenomen,

 

Die ons all' het Bruy-lof kleet comt coopen,

 

's Bruylofts vreuchden comt in 't hert ons hoopen.

 

Wilt u all' verblijden.

 

 

 

Looft den Heer, gheworden onsen broeder,

 

Looft Mariam ons' en sijne Moeder,

 

Die in liefd' en in jolijt verslonden,

 

'Thooghste goedt omhelst nu t' alle stonden.

 

Wilt u all' verblijden.

 

 

 

Comt hier, sondaer, comt dit kindt ghenaecken,

 

Want ghy nu tot quytingh cont gheraecken,

 

Comt gheloopen alle 'sHeeren vrinden,

 

Comt hier gratie, comt hier glorie vinden.

 

Wilt u all' verblijden.

 

 

 

Comt dit kindt met alle hert omvanghen,

 

'tStaet bereet om jonstich u t' ontfanghen,

 

Wat geluck is 't dien mont te kussen,

 

Sijn reyn liefd' in dat gheniet te blussen.

 

Wilt u all' verblijden.

 

 

 

Comt hier, Maeghden, comt hier reyn ghemoeden,

 

Comt gheniet den afgrondt aller goeden,

 

Die u nu in natuer comt vrijen,

 

Om u eewich te ghebenedijen,

 

Wilt u all' verblijden.