Den Gheestelycken leeuwercker vol godtvruchtighe liedekens ende leyssenen

(1645)–Guilielmus Bolognino– rechtenstatus


Ander. Treckt Herders nae den stal, Daer henen spoeyt u al, Daer suldy sien een kindt, Dat u bemint: Dat comt vergieten voor u al sijn bloedt, Om u te coopen u oneyndich goet. TReckt, Herders, nae den stal, Daer henen spoeit u al, Daer sult ghy sien een kindt, Dat u bemint, Dat comt vergieten voor u all' sijn bloedt, Om u te coopen u oneyndich goedt. Dat, in een krib gheleyt, Om uwent wil nu schreyt, Den hemel dat verheught Met alle vreught, Op 't hoy in doeckskens stijf van kouw het beeft, Aen alle dieren dat hun hitte gheeft. Gaet daer, nae uwen wensch,
[pagina 37]
Godt sien gheworden mensch, Die daer onnnoosel light, Als een kleyn wight, Gaet onder snootheydt sien de Maiesteyt, De wijsheydt onder kindtse slechticheydt. Gaet sien hem suyghen daer, Die 't hier laeft allegaer, Siet hoe dat hem behaeght 'T sogh van een maeght, 'T sogh dat hy in haer borsten vloeien doet, Hy, die den oorspronck is van alle goedt. Siet, hy van liefde heet, 'Tonthelsen u bereet, Ghenaedich u verwaght, Soo seer u acht, Den kus van vre die u daer gheven sal, Den vre die inbrenght in dit tranen dal. Gaet hem daer bidden aen, Daer nae sijn gratie staen, Die hy om niet daer gheeft, Daert al door leeft, Die is de mensch ghecomen in 't ghesicht, Op dat hy eens hem sie in 't eewich licht.