Boec vander wraken

[p. 287]

Het boec vander wraken.

Prologhe.

Allen kerstenen menschen /
Die na Gods gratie wenschen /
Gruetic / onnutte knecht /
Van sinne zere plomp ende slecht /
Metter gratien van Onsen Here /
Die met Hem duere emmermeere.
Sinte Pauwels seghet / die lerere fijn:
Alle scriften die gescreven sijn
Sijn tonser leringhen ghescreven /
Dat wi dbeste selen leven
Ende dat archste selen vlien
Also wijt ghescreven sien.
Daer om so biddic met trouwen
Hen die dit boec selen scouwen /
Dat si studeren met sinne
Die materie diet heeft inne /
Ende daer ane willen leren

[p. 288]

 

Kennen die vreese Ons Heren;

 

Want / also ons David seyt /

20

Springt daer wt alle wijsheyt;

 

Want die wt Gods vreesen es

 

Es wt sire hope / sijts ghewes.

 

Ende God soude wreken sonder beyden /

 

En dade sine ontfermecheyde;

25

Want sine wrake sekerlike

 

Menegherande es op ertrike /

 

Ende comt oec tenen cloppe

 

Als men daer minst mict oppe.

 

God gheve ons sijn vrese also

30

Dat wi ewelijc sijn met Hem vroe.

 

Dit es dboec van Gods wraken.

 

God laet mi wel gheraken /

 

So dat mi nieman en begripe der in.

 

Nu so hoert hier mijn beghin.